БНАСАУ-д албан ёсны айлчлал хийсэн БНХАУ-ын дарга Ши Зиньпин Умард Солонгосын удирдагч Ким Чен Унтай хэлэлцээр хийснийхээ үр дүнд "гэрэлт ирээдүйн төлөө" хоёр орон хамтран ажиллахаар тохиролцсон гэж Синьхуа агентлаг мэдээлжээ.
БНХАУ, БНАСАУ-ын удирдагчид мөн Хятадын коммунист нам, Солонгосын Хөдөлмөрийн намын гишүүдийн хооронд яриа хэлэлцээр хөгжүүлэхийн чухлыг тэмдэглэсэн байна. БНАСАУ-ын Төрийн зөвлөлийн дарга Ким Чен Ун ч бас "БНХАУ-тай нөхөрсөг харилцаагаа илүү их дээд хэмжээнд бэхжүүлэхийг" чухалчилсан байна.
Ши Зиньпин нөхөр Ким Чен Унтай уулзахдаа Вашингтон, Пеньян хоёр яриа хэлэлцээгээ үргэлжлүүлж хэлэлцээрийнхээ явцад амжилт олно гэдэгт итгэлтэй байгаагаа илэрхийлжээ. БНХАУ-ын удирдагч бас өнөөгийн олон улсын нөхцөл байдлын өөрчлөлт БНАСАУ болон хятадын найрамдалд нөлөөлөхгүй гээд Солонгосын хойгийг цөмийн зэвсэггүй бүс болгох асуудлыг шийдвэрлэхэд Бээжин идэвхтэй оролцохоо тэмдэглэсэн байна. Умард Солонгосын удирдагч Ким Чен Ун хариуд нь олон улсын түгшүүртэй байдлыг намжаах талаарх Пеньяны хүчин чармайлтад АНУ-ын хариу ажиглагдахгүй байна, “тэвчээртэй хүлээж байна” гэжээ.
Умард Солонгосын тэргүүн Ким Чен Ун, БНХАУ-ын дарга Ши Зиньпин тав дахь удаагаа уулзахдаа харилцан итгэлцлийг бэхжүүлэх болон чухал асуудлаар харилцан зөвшилцөлд хүрлээ гэж БНАСАУ-ын мэдээллийн төв агентлагийн мэдээнд дурдсан байна.
“Ким Чен Ун нэг жилд болсон таван удаагийн уулзалт сайхан болж, дотно харилцаа тогтон, харилцан ойлголцож чухал асуудлуудаар ойлолцолд хүрэн, нөхөрсөг итгэлцэл улам гүнзгийрэн хэдийгээр дэлхий дахины нөхцөл байдал өөр байгаа ч хоёр тал, хоёр орны ирээдүйд чиглэсэн нөхөрсөг харилцааг урагш хөгжүүлэх санал бодлоо илэрхийлсэн” гэж агентлаг тэмдэглэжээ.
Хоёр орны удирдагч өөр өөрийн улс орны дотоод болон гадаад бодлогын чухал асуудлуудыг харилцан ярилцаж хамтын сонирхол, эрх ашгийн асуудлаар бүтээлч яриа өрнүүлсэн гэсэн байна.
Ши Зиньпин БНХАУ-ын Ерөнхий сайдын орлогч байхдаа 2008 онд БНАСАУ-д айлчилж байсан юм. БНХАУ-ын удирдагч Ху Зиньтао 2005 онд БНАСАУ-д айлчилсан байна.
Харин Умард Солонгосын тэргүүн нэг жилийн дотор БНХАУ-д дөрвөн удаа айлчилсны эхнийх нь өнгөрсөн оны гуравдугаар сард болсон бол сүүлийнх нь энэ оны нэгдүгээр сард болсон юм.
Сүүлийн айлчлалаараа Ким Чен Ун БНХАУ-ын даргыг Умард Солонгост айлчлахыг урьсан юм.
Эх сурвалж: АРДЧИЛАЛ ТАЙМС СОНИН
