x

П.Порошенко Украины засгийн газрыг тэргүүлэхэд бэлэн гэлээ

Украины Ерөнхийлөгч асан Петр Порошенко өөрийнх нь нам одоо болох парламентын сонгуульд ялах юм бол Засгийн газрын тэргүүнээр ажиллахад бэлэн байна гэж мэдэгджээ.

Тэрээр “Хэрэв бид сонгуульд ялах юм бол, тэгнэ” гэж Украины Олон нийтийн телевизэд ярилцлага өгөх үеэрээ сурвалжлагчийн асуултад хариулсан байна. Мөн сонгуулийн дараа парламентын гишүүнээрээ үлдэх үү, депутатынхаа мандатаас татгалзаад Ерөнхий сайд болох уу гэдгээ тодорхой хэлсэнгүй.

“Европын эв нэгдэл” намын өнгөрсөн ням гаригт болсон их хурал дээр “Петр Порошенкогийн бүлэг” төрийн экс тэргүүнийг ирэх сонгуульд нэрсийн жагсаалтын эхний аравт бичигдэнэ гэжээ.

Энэ жагсаалтад парламентын тэргүүн Андрей Парубий, парламентын дэд дарга Ирина Геращенко, Зэвсэгт хүчний десантын цэргийн командлагч Михаил Забродский, дуучин София Федина, парламентын гишүүн Мустафа Жемилев нарыг оруулсан байна.

Намынхаа их хурал дээр Петр Порошенко Оростой харилцаагаа цаашид улам холдуулж таслах нь намын улс төрийн гол үзэл баримтлал гэсэн байна. Гэхдээ олон нийтийн санал асуулгаар “Европын эв нэгдэл” нам Украины ард иргэдийн дунд тун нэр хүнд муутай, хүн амын 52 хувь нь дэмжихгүй гэж хариулж байгаа юм.

Х.Өлзийбаяр "Ардчилал таймс" сонин

iСанал болгох
АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.
Top