78 настай Назарбаев гуравдугаар сард ерөнхийлөгчийн суудлаас огцрох гэнэтийн шийдвэр гаргаж, парламентын спикер Касым Жомарт Токаевыг залгамжлагчаараа томилсон юм. Ерөнхийлөгчийн тангараг өргөсөн даруйдаа Токаев хамгийн түрүүнд улсын нийслэл Астанагийн нэрийг Нур-Султан болгон өөрчилсөн билээ.

Дөрөвдүгээр сард Токаев ээлжит бус сонгууль зарласнаа “эрх мэдэл шилжүүлэх үйл явцын эргэлзээг арилгах зорилготой” хэмээн тайлбарласан байна. Ерөнхийлөгчийн сонгуульд түүнтэй зургаан хүн өрсөлдөж байгаа ч тэдний хэн нь ч хүчтэй өрсөлдөгч биш.

Харин энэ хооронд Назарбаев эрх мэдлээ баталгаажуулсаар байгаа. Тэр үндэсний аюулгүй байдлын зөвлөлийн дарга, эрх баригч Нур Отан намын дарга хэвээр байна. Назарбаев тус улсын баялгийн сан дахь хяналтаа нэмэгдүүлжээ.

Гэвч өнгөрсөн хугацаанд Казахстан даяар иргэдийн эсэргүүцэл, бухимдал нэмэгдсээр байна. Нийслэлийн нэрийг солихыг эсэргүүцсэн шаардлагад 40,000 орчим хүн гарын үсэг зуржээ. Өнөөдөр болох сонгуулийг ч мөн хууль бус, бусад өрсөлдөгчдөд сонгуульд бэлтгэх боломж олгоогүй гэж үзсэн тэмцэгчид саналаа өгөхгүй бойкотлохыг иргэдэд уриалж байна.

Сүүлийн таван жилийн хугацаанд газрын тосны үнэ унаж, хөрш ОХУ-ын эдийн засаг өрнөдийн хоригт орсноор Казахстаны эдийн засаг сулраад байгаа нь иргэдийн бухимдал нэмэгдэхэд нөлөөлж байгаа юм.

Казахстаны Сонгуулийн Төв комисс энэ удаагийн сонгуулийг нээлттэй, шударга явуулахаа амлаж байгаа. Гэвч Токаевыг 72.7 хувиар ялна гэсэн урьдчилсан таамгийг тус комисс гаргажээ.

Ням гарагийн сонгуулийн өмнөхөн “Wake up, Kazakhstan” нэртэй хөдөлгөөн өрнөж эхэлсэн байна. Хөдөлгөөнийг санаачлагчид өмнө нь олон удаа эсэргүүцлийн арга хэмжээ зохион байгуулж, баривчлагдаж, шийтгүүлж байсан идэвхтнүүд юм.