Нийслэлийн Засаг даргын 2016-2020 оны үйл ажиллагааны хөтөлбөрийг хэрэгжүүлэх, төрийн үйлчилгээний шат дамжлагыг бууруулж, чирэгдэлгүй, ил тод, түргэн шуурхай үйлчилгээг иргэдэд хүргэх зорилтын хүрээнд Нийслэлийн нутгийн захиргааны таван байгууллагын 47 үйлчилгээг цахим хэлбэрт шилжүүлж, нэгдсэн системд оруулжээ.
Нийслэлийн цахим үйлчилгээний нэгдсэн eService.ulaanbaatar.mn портал нэвтэрснээр иргэд төрийн үйлчилгээг цахимаар авах нөхцөл бүрдэж, иргэд аж ахуйн нэгжүүд авах үйлчилгээнийхээ шийдвэрлэлтийн явцад хяналт тавих боломжтой болсон байна. Ингэснээр үйлчилгээний хоног хугацаа, шат дамжлага багасч, үйлчилгээний төлбөр хураамжийг онлайнаар төлөх зэрэг олон талуудтай болжээ.
Одоогийн байдлаар Нийслэлийн Архивын газраас иргэн, хуулийн этгээдэд 19 нэр төрлийн лавлагааны үйлчилгээг онлайнаар өгч эхлээд байна.
Иргэн, аж ахуйн нэгж eService.ulaanbaatar.mn цахим системд нэвтрэхдээ Үндэсний танилт нэвтрэлтийн нэгдсэн ДАН системд хандаж өөрийгөө цахим орчинд нотолсны дараа үйлчилгээ авах хүсэлтээ гаргах юм байна. Харин цахим систем ашиглах боломжгүй иргэд үйлчилгээний нэгдсэн төвүүдэд хандаж хүсэлтээ гаргана.
Нийслэлийн үйлчилгээний нэгдсэн төвийн Дүнжингарав, Мишээл, Драгон, Оргил салбаруудаас үйлчилгээ авахад үйлчилгээний төлбөрийг банкны карт уншуулж, онлайн төлбөрийн эрхтэй карт ашиглан гэрээсээ төлөх бололцоотой юм байна.
