БНХАУ-ын Хөх хотноо зохион байгуулсан “Хөх хот-2019” жүдо бөхийн Гран при ангиллын тэмцээн болж, тэмцээнд Хөдөлмөрийн баатар, гавъяат тамирчин Н.Түвшинбаяр +100 жинд мөнгөн медаль, -100 кг-д өрсөлдсөн Л.Отгонбаатар хүрэл медалийн эзэн болжээ.
Н.Түвшинбаяр нь олимпоос алтан медаль хүртсэн түүхт 10 жилийн ой дээрээ “Хөх хот- 2018” Гран пригаас алтан медаль хүртэж байсан бол, энэ жил “Хөх хот-2019” гран при тэмцээнээс мөнгөн медаль хүртлээ. Гурван өдөр үргэлжилсэн тус тэмцээнд манай улсаас нийт 24 бөх барилдаж, Олимпын аварга Н.Түвшинбаяр эрэгтэйчүүдийн +100 кг-д барилдан мөнгө медаль авсан бол , Л.Отгонбаатар нар хүрэл медаль хүртсэн байна.
Хөх хотын Гран прид Хөдөлмөрийн баатар Д.Сумъяа, Азийн аварга Ц.Цогтбаатар, ДАШТ-ий хүрэл медальт Ө.Дүүрэнбаяр, Н.Дагвасүрэн, Азийн АШТ-ий мөнгөн медальт, УАШТ-д сүүлийн дөрвөн жил дараалан түрүүлсэн Б.Ганхайч, ДАШТ-ий хүрэл медальт, Гавьяат тамирчин Г.Одбаяр нар барилдаж ялагдан, тэмцээнээ дуусгаснаар монгол жүдочид багийн дүнгээр XI байрт шалгарчээ.
Харин Солонгосын баг тамирчид 4 алт, 2 хүрэлтэйгээр тэргүүлж, араас нь Япон 3 алт, 2 мөнгө, 1 хүрэлтэй удааллаа.
Дашрамд дуулгахад, Дэлхийн жүдо бөхийн холбооны www.ijf.org сайтнаа "Монголын Найдангийн Түвшинбаяр бол Домог" хэмээн онцолжээ.
Сэтгэгдэл (1)