“Nike”, “Adidas” тэргүүтэй гутал үйлдвэрлэгч 173 компани БНХАУ-д үйлдвэрлэсэн гуталнуудад ногдуулах татварыг нэмэгдүүлэхгүй байхыг АНУ-ын Ерөнхийлөгч Дональд Трампт уриалан, захидал илгээжээ. Захидалд  “Импортын татвараа 25 хувьд хүргэж өсгөсөн нь хэрэглэгчдэд нь сөрөг нөлөө үзүүлнэ” гээд худалдааны маргаанаа дуусгахыг хүсчээ.

АНУ-ын засаг захиргаа Хятадын 300 тэрбум ам.долларын өртөг бүхий импортын бараа бүтээгдэхүүнд 25 хүртэлх хувийн татварыг ногдуулахаар бэлтгэж байгаа аж. Хэрэв энэ шийдвэр хэрэгжиж эхэлсэн тохиолдолд тоглоом, гар утас, пүүз зэрэг Америкийн Хятадаас импортолж буй бараг бүх бараа бүтээгдэхүүний татвар нэмэгдэх төлөвтэй байна.

АНУ-ын Ерөнхийлөгчид илгээсэн гутал үйлдвэрлэгч компаниудын захидалд дурдсанаар, татварыг нэмэгдүүлэх нь хэрэглэгчдэд нь төдийгүй Америкийн эдийн засагт хохирол учруулна гэжээ. Түүнчлэн энэ төрлийн үйл ажиллагаа нь компаниудын хэрэглэгчдэд жил тутам 7 тэрбум ам.долларын нэмэлт зардал бий болгож магадгүйг онцлоод, худалдааны дайныг дуусгавар болгох цаг болсон хэмээн бичжээ. 

Үйлдвэрлэгчдийн хэлж байгаагаар АНУ гуталнаас дунджаар 11.3 хувийн татвар авдаг бол зарим тохиолдолд татвар нь 67.5 хувьд хүрч өсдөг байна. “Харин татварыг 25 хувь болгож нэмснээр Америкийн зарим гэр бүл гутландаа 100 орчим хувийн татвар төлөхөөр болж байна” гэж үйлдвэрлэгчид захидалдаа өгүүлжээ.

АНУ БНХАУ хоёр ирэх зургаадугаар сард Японд болох "Их 20"-ийн уулзалтын үеэр дахин худалдааны асуудлаар хэлэлцэхээр төлөвлөөд байна.