Британий ханхүү Харри, гүнгийн авхай Меган нар өчигдөр шинээр мэндэлсэн хүүгээ анх удаа хэвлэлийнхэнд танилцуулж, Арчи Харрисон Маунтбаттен-Уиндсор гэж нэр хайрласнаа зарлажээ.

Хосууд Хатан хаан Элизабет, түүний нөхөр ханхүү Филип, Меганы ээж Дориа Раглэнд нарт хүүгээ харуулж буй гэрэл зургийг өөрсдийн албан ёсны инстаграм хуудсандаа нийтэлсэн байна.

Хосууд өнгөрсөн жилийн тавдугаар сард хуримаа хийж байсан Уиндсорын шилтгээний сүмд цугларсан цөөн тооны сэтгүүлчдэд шинээр мэндэлсэн хүүгээ танилцуулсан байна.

Британий хаан ширээг залгамжлах хүмүүсийн долдугаарт бичигдэж байгаа Арчи хүү өнгөрсөн даваа гаригийн өглөө 3.26 кг жинтэй мэндэлсэн юм.

Сонирхуулахад хатан хааны гэр бүлийн шинэ гишүүн мэндэлсэн даруйдаа л олон жил хадгалагдан ирсэн хэд, хэдэн уламжлалыг эвдсэн билээ. Жишээ нь Диана гүнж, Кейт Миддлтон нар хүүхдээ өлгийдөн авснаас хэдхэн цагийн дараа шинэ хүүхдээ ард түмэндээ харуулж, мэндчилдэг байсан бол гүнгийн авхай Меган хувийн орон зай хүсэж, энэ заншлыг дагаагүй юм.

Дашрамд, Британий язгууртны гэр бүлд өнгөт арьстай хүүхэд мэндэлж байгаа нь ховор тохиолдол бөгөөд зарим түүхчид Арчи хүүг Британий язгууртнуудын гэр бүлийн сүүлийн 300 жилийн түүхэнд анх удаа Африк ген авч ирсэн хүүхэд гэж дүгнэж байгаа аж.

Мөн хааны гэр бүлд төрсөн шинэ хүүхэд төрмөгцөө шууд ханхүү, гүнж болохгүй, ханхүү, гүнж болох эсэхийг хатан хаан зарлигаар шийддэг ажээ.