Венесуэлийн Ерөнхийлөгч Николас Мадуро АНУ-ыг Боливарын бүгд найрамдах улсын эсрэг уламжлалт биш дайн хийж байна гэж буруутгаад Вашингтон Латин Америк, Карибын тэнгисийн сав газрыг колончилж эрхшээлдээ оруулахыг эрмэлзэж байна гэсэн байна. “Тэд манай эх орныг сульдаахын тулд уламжлалт бус дайн хийж, хэсэг бусаг урвагч бүлэглэлийн тусламжтайгаар манай зэвсэгт хүчнийг дотроос нь хагалан бутаргахын тулд их хэмжээний хөрөнгө мөнгө цацаж байна” гэж төрийн тэргүүн хэлснийг РИА Новости агентлаг эш татжээ.

Өнгөрсөн долоо хоногийн мягмар гарагт тус улсад төрийн эргэлт хийх оролдлого гарч сөрөг хүчний удирдагч Хуан Гуайдо Ерөнхийлөгч Николас Мадурог түлхэн унагаахыг оролдсон юм. Венесуэлийн Батлан хамгаалахын сайд Падрино Лопесын мэдэгдсэнээр цэргийн зарим хэсэг эсэргүүцлийнхэнтэй нэгдсэн ч гэсэн Засгийн газар үймээнийг дарж чадсан гэнэ.

Н.Мадурог түлхэн унагах оролдлого амжилтгүй болсныг Х.Гуайдо хүлээлээ

Венесуэлийн сөрөг хүчний удирдагч Хуан Гуайдо өнөөгийн Ерөнхийлөгч Николас Мадурог түлхэн унагах оролдлого бүтэлгүйтсэнийг хүлээн зөвшөөрсөн байна. Тэрээр The Washington Post сонинд өгсөн ярилцлагадаа нэг талаас цэргийнхний зүгээс дэмжлэг авч чадаагүй, нөгөө талаар АНУ-ын талаас Венесуэльд цэргийн интервенц хийх тухай саналыг хүлээн аваагүй байснаас болж энэ төлөвлөгөө бүтээгүй гэжээ.

Х.Гуайдогийнхоор бол цэргийнхэн бөөнөөрөө сөрөг хүчний талд ороод эхэлбэл Мадуро бүрэн эрхээсээ татгалзана гэж тооцож байгаа ч харамсалтай нь ийм явдал болсонгүй. Тэгэхээр бид буруу тооцоолж байсан хэрэг гэж улстөрч хэлсэн байна. “Үндсэн хуулиа хамгаалахад бидэнд өнөө хүртэл бүүр их хэмжээний цэргийнхний дэмжлэг хэрэгтэй юм байна” гэж Х.Гуайдо мэдэгджээ. АНУ-ын зүгээс Венесуэльд цэрэг оруулах санал тавибал яах вэ, хэрэв АНУ-ын Ерөнхийлөгчийн аюулгүй байдлын зөвлөх Жон Болтон цэрэг оруулъя гэж утаствал яах вэ гэхэд Хуан Гуайдо “Ийм хувилбарт баярлалаа гэж хэлнэ. Энэ саналыг бид ярилцаад энэ хямралыг шийдвэрлэхийн тулд магадгүй парламентаар авч хэлэлцэнэ. Үнэхээр энэ хэрэгтэй гэж үзвэл бид зөвшөөрнө” гэж хариулсан байна.

Х.Өлзийбаяр