Төрийн эргэлт хийхээр хуйвалдагчдыг буулган авахыг Венесуэлийн Ерөнхийлөгч Николас Мадуро цэргийн албан хаагчдад пүрэв гаригт уриалсан байна.

Засгийн газрыг дэмждэг хүчин, сөрөг хүчний хоорондын мөргөлдөөн хоёр хоног үргэлжилсний дараа Н.Мадуро нийслэл Каракас хотын цэргийн баазад цэргүүдийн дунд зогсож байхдаа уг мэдэгдлийг хийжээ.

Сөрөг хүчний удирдагч Хуан Гуайдо лхагва гаригт цэргийн бослого гаргахыг завдаж, Н.Мадурог албан тушаалаас нь шахан буулгахыг оролдсон юм. Мөн тэрбээр Засгийн газрыг түлхэн унагаахын тулд жагсаал цуглаан өрнүүлэхийг төрийн албан хаагчдад уриалсан билээ.

Гэсэн хэдий ч Н.Мадуро цэргийн албан хаагчдын үнэнч байдлыг магтан сайшаагаад, бидний ариун газар нутагт хэн ч гар хүрч, дайн дажин авчирч зүрхлэхгүй гэж хэлжээ.

Сөргөлдөгч хүчнүүдийн мөргөлдөөний үеэр дөрвөн хүн амиа алдсаны дунд хоёр өсвөр насны хүүхэд байжээ.

Өнгөрсөн нэгдүгээр сард Х.Гуайдо өөрийгөө Венесуэлийн түр Ерөнхийлөгч хэмээн зарлаж, 2018 оны тавдугаар сард болсон ерөнхийлөгчийн сонгуулийг хууль ёсны бус хэмээн мэдэгдсэн юм.

Сөрөг хүчнийхэн олонхын суудал эзэлдэг Үндэсний ассамблейн дарга Х.Гуайдог АНУ, Их Британи, Латин Америкийн дийлэнх орнууд зэрэг 50 гаруй улс хүлээн зөвшөөрсөн юм.

Харин Н.Мадурог ОХУ, БНХАУ болон Венесуэлийн зэвсэгт хүчний удирдагчид дэмжиж байгаа юм. “Н.Мадуро Венесуэлээс зугтан гарахад бэлэн байсан” гэх АНУ-ын Төрийн нарийн бичгийн дарга Майк Помпеогийн мэдэгдлийг тэрбээр няцаагаад, төрийн эргэлт хийх оролдлогыг зааварчилсан хэмээн АНУ-ыг буруутгажээ. 

montsame.mn