Майн нэгэн буюу тавдугаар сарын 1-д дэлхий даяр тэмдэглэдэг баярын нэг байлаа. Тэртээ 1886 оны тавдугаар сарын 1-нд америкийн Чикаго хотноо ажилчид хөдөлмөрийн нөхцөл, цалин хөлснийхөө төлөө жагсан найман цаг ажлаа хаяж байсан аж. Жагсагчид цагдаагийнхантай мөргөлдөж, цагдаа нар ажилчдлын эсрэг гал нээсэн юм. Энэ явдлаас гурван жилийн дараа хоёрдугаар Интернационалын Парисын Конгрессын хурлаас тавдугаар сарын 1-нийг дэлхий дахины хөдөлмөрчдийн эв санааны нэгдлийн өдөр хэмээн зарласнаар Майн-1 гэдэг баяр үүссэн юм.
1891 оноос жил бүр ОХУ-д Хавар болон Хөдөлмөрийн баярын өдөр болгон тэмдэглэдэг уламжлалтай болжээ. Энэ жилийн Хөдөлмөрийн баярын жагсаалд орон даяар 2.4 сая гаруй хүн оролцсон хэмээн ОХУ-ын Дотоод хэргийн яамнаас мэдээллээ.
Жагсаалд оролцогчид зохистой цалин хөлс, хямд орон сууц болон үнэ, тарифын өсөлтийн эсрэг дуу хоолойгоо нэгтгэсэн байна.
Хөдөлмөрийн баярын өдөр Москва хотын Улаан талбайд болсон жагсаалд 100 мянга гаруй хүн оролцож "Ажилчдын ашиг сонирхлыг дээдэлсэн шударга эдийн засгийн төлөө!", "Амар амгалан, Хөдөлмөр, Тавдугаар сар!", "Хөдөлмөрчдийн хөдөлмөрлөх эрхийн төлөө!", "Зохистой цалин хөлс эрүүл нийгмийг бүтээнэ!" зэрэг уриа, лоозон барижээ. Жагсаалын тэргүүн эгнээнд ОХУ-ын үйлдвэрчний эвлэл, олон нийтийн байгууллагын удирдлагуудаас гадна Москва хотын захирагч С.Собянин, Москва хотын Думын дарга А.Шабанников нар алхаж жагсаалд нэгдсэн байна.
Оросуудын хувьд Майн баярыг өргөн тэмдэглэдэг бөгөөд урт амралтын өдрүүд эхэлдэг. 5 дугаар сарын 1-ээс 5-ны өдөр Майн-1, хөдөлмөрийн баярыг тохиолдуулан бүх нийтээрээ амардаг бол, 9-12-ны өдрүүдэд Ялалтын баярыг тохиолдуулан мөн л орон даяар амардаг аж.
