Өөрийгөө Луганскийн бүгд найрамдах улс, Донецкийн бүгд найрамдах улс хэмээн тунхаглаж Украины эрх баригчидтай мөргөлдөж байгаа зүүн мужийн иргэдэд хүсэлтийнх нь дагуу Оросын паспорт олгох тухай зарлигт ОХУ-ын Ерөнхийлөгч Владимир Путин гарын үсэг зуржээ. Ийм байдлаар Кремль Украины шинэ удирдлагатай наймаа тохиролцох босгоо өндөрсгөж байна гэж шинжээчид үзэж байна.
Путины дөрөвдүгээр сарын 24-ний өдөр гарын үсэг зурсан энэ зарлигаар “Иргэншлийн тухай” хуульд өөрчлөлт оруулж Украины Луганск, Донецк мужийн иргэдийн ОХУ-ын иргэншил авах хүсэлтийг хүлээн авч гурван сарын хугацаанд шийдвэрлэх тухай заасан юм байна.
Петербургт болсон хууль тогтоогчдын зөвлөл дээр Владимир Путин хэлэхдээ энэ шийдвэр бол Луганскийн бүгд найрамдах болон Донецкийн бүгд найрамдах улсын иргэдийн эрхийг хамгаалах зорилготой болохоос биш Москва Украины шинэ Засгийн газартай асуудал үүсгэх зорилгогүй гэж мэдэгдсэн байна. Донецк, Луганскийн бүгд найрамдах улсуудын тэргүүн гээд байгаа Денис Пушилин, Леонид Пасечник нар өөрсдийн блогтоо В.Путины энэ шийдвэр бол удаан хүлээсэн шийдвэр гэсэн байна.
Украины өнөөгийн Ерөнхийлөгч Петр Порошенко энэ зарлигийг Украины тусгаар тогтнолыг зөрчсөн бүдүүлэг шийдвэр гээд Кремль ийм байдлаар Донбассыг өөртөө хавсаргах алхмаа хийж байна гэжээ.
"Ардчилал таймс" сонин
