Францын нийслэлд орших Парисын дарь эхийн сүм /Ностра Дам/-д гал гарч, дээврийн хэсэг нь бүрэн шатаж, оройд байрладаг цаг нуран унасан тухай бид мэдээлсэн. Тус сүмд өчигдөр орой буюу орон нутгийн цагаар 2019 оны 4 дүгээр сарын 15-ны өдрийн 18 цагийн орчимд гал гарч эхэлсэн бөгөөд сүмийг сэргээн засварлах ажил явагдаж байсан нь гал гарах шалтгаан болсон байж магадгүй гэж олон улсын хэвлэлүүд мэдээлж байна.

400 гаруй гал сөнөөгчид хэдэн цагийн турш шаргуу ажилласны дүнд галыг бүрэн унтраасан байна.

850 жилийн түүхтэй, дэлхийн түүхэн өв, дурсгалуудын нэг болох Парисын дарь эхийн сүмийн гол чулуун байгууламжуудаас бусад нь бүхэлдээ сүйдээд байна. 

Энэ харамсалтай үйл явдлын дараа Францын тэрбумтан Франсуа-Хенри Пино сүмийг сэргээн засварлах ажилд гэр бүлийнхээ зүгээс 100 сая евро хандивлана гэж мэдэгдлээ. Тэрбээр "Миний бие болон эцэг минь 100 сая еврог гаргаж Нотр Дамыг бүрэн завсарлах үйлсэд өөрийн хувь нэмрийг оруулахаар шийдлээ" гэжээ. 

Франсуа Хенри Пино нь "Kering" олон улсын группийн Гүйцэтгэх захирал, ТУЗ-ийн дарга, Францын тэргүүлэгч группуудын нэг болох "Artémis"-ийн Ерөнхийлөгчийн албыг хашдаг безнэсмен аж. 

Түүнчлэн Парисын Дарь эхийн сүм шатсантай холбоотойгоор Францын Ерөнхийлөгч дээрх явдлыг "асар эмгэнэлт явдал" хэмээн тэмдэглэж, сүмийг сэргээн босгох кампанит ажлыг олон улс даяар өрнүүлэхээр болсноо мэдэгдээд байна. 

Парисын прокурорын алба гал түймрээс үүдэлтэй эвдрэл сүйдлийг шинжлэхээр судалгааны ажил эхлүүлжээ.