Францын нийслэлд орших Парисын дарь эхийн сүм /Ностра Дам/-д гал гарч, дээврийн хэсэг нь бүрэн шатаад байгаа ба оройд байрладаг цаг нуран унажээ. Тус сүмд өчигдөр орой буюу орон нутгийн цагаар 2019 оны 4 дүгээр сарын 15-ны өдрийн 18 цагийн орчимд гал гарчээ.
Одоогоор галын шалтгаан тодорхойгүй байгаа бөгөөд францын AFP агентлагийн мэдээлж буйгаар сүмийн дээд давхарт хийгдэж байсан засварын ажлаас үүдсэн байж болзошгүй гэнэ.
Парис хотын захирагч “Парисийн дарь эхийн сүмд аймшигт гал гарлаа. Бид гал сөнөөгчидтэй хамтран галыг цурманд оруулахаар ажиллаж байна” хэмээн өөрийн Твиттер хуудсандаа бичиж хотын оршин суугчдыг сүмийг тойрсон аюулгүй ажиллагаанд саад учруулахгүй байхыг хүсчээ.
Парис хотын төвд орших уг католик сүм 1163 онд баригдсан бөгөөд 1991 онд ЮНЕСКО-ийн соёлын өвд бүртгэсэн юм.
Одоогоор 850 жилийн настай Католик сүмийн модон орой болон дээврийн хэсэг бүрэн шатсан ба оройд байрладаг цаг нурсан. Харин гол чулуун байгууламжууд нь бүтэн үлдсэн байгаа гэнэ.
