Элэгний өвчлөлөөр манай улс олон улсад дээгүүр байр эзэлдэг. Элэгний шалтгаанаар нас барагсдын тоо ч өндөр байгаа билээ. Манай улсад элэгний өвчлөлийг эрт илрүүлэх, эмчлэх арга барил олон улсын түвшинд хүртлээ хөгжсөн гэдгийг мэргэжлийн эмч нар хэлж байна. Манай улсад Дэлхийн шилдэг таван мэс засалчийн нэг О.Сэргэлэн УНТЭ-т ажиллаж байна.

УНТЭ нь 2010 оноос эхлэн элэг шилжүүлэн суулгах мэс заслыг БНСУ-ын Асан төвтэй хамтран хийж эхэлсэн бөгөөд өнөөдрийн байдлаар 70 удаагийн элэг шилжүүлэн суулгах мэс заслыг амжилттай хийгээд байна. Элэг шилжүүлэн суулгах мэс заслын багын ахлахчаар хүний гавьяат эмч О.Сэргэлэн ажилладаг. Түүний хувьд 2017 онд дэлхийн шилдэг таван мэс засалчын нэгээр шалгарсан юм.

Элэг шилжүүлэн суулгах мэс заслыг хийхэд 50 гаруй эмч, сувилагч, мэргэжлийн хүмүүс оролцдог байна. Мөн 300 орчим эм тариа багаж хэрэгслийг шинээр ашигладаг аж. Нэг хагалгаа дунджаар 15 орчим цаг үргэлжилдэг байна. Монгол улсад хийгдсэн хамгийн анхны элэг шилжүүлэн суулгах мэс засал 38 цаг үргэлжилж байжээ.  

Дэлхийн шилдэг мэс засалчдын нэг болох О.Сэргэлэн нь 37 жилийн хугацаанд 6000 гаруй мэс заслыг баг хамт олонтой хамтран хийжээ. Элэг шилжүүлэн суулгах хагалгааг хамгийн залуухан буюу нэг ой 3 сартай хүүхдэд хийж амьдрал бэлэглэж байсан бол хамгийн өндөр настай нь 62 настай иргэнд хийж эдгээр хүмүүс өнөөдөр эрүүл саруул амьдарч байна гэлээ.