Дэлхий даяар боловсролын түвшний ялгааг арилгах зорилготой ажилладаг "Varkey Foundation" сангийн “Global Teacher Prize - Дэлхийн шилдэг багш” шагнал гардуулах ёслол Арабын Нэгдсэн Эмират улсын Дубай хотноо боллоо.

Энэ жилийн шилдэг багшаар Африкийн Кени улсын математик, физикийн багш Питер Табичи шалгарч, $1 саяын мөнгөн шагналаар шагнууллаа.

Питер Табичи нь Кени улсын нэгэн тосгоны математик, физикийн багш бөгөөд тэрээр цалингийнхаа 80 хувийг ядуу буурай хүүхдүүдэд туслахад зарцуулдаг байна.

Кенийн Руани тосгон дахь Керико бүрэн дунд сургууль нь хэт алслагдсан газарт байдаг учраас нэг ангид 70-80 хүүхэдтэй, хүүхдүүд хичээлдээ явахын тулд ган гачиг, үер устай үед багадаа долоон км алхдаг байна. 

Питер Табичи багш ядуу буурай, амьдралын боломжгүй хүүхдүүдэд цалингийнхаа 80 хувийг зориулдаг байна. Тэрээр хүүхдүүдэд хичээлийн хэрэгсэл, дүрэмт хувцас, ном дэвтэр авч өгөхөд тусалдаг байна. Энэ сургууль ганцхан компьютертай аж.

Тус тосгоны хүүхдүүдийнх нь 90 хувь нь ядуу гэр бүлд амьдардаг, 30 хувь нь өнчин учраас хууль бус мансууруулах бодис, өсвөр насны жирэмслэлт, сургууль завсардах, амиа егүүтгэх зэрэг үзэгдэл түгээмэл байдаг гэнэ.

Ийм хүнд нөхцөл байдлаас Табичи багш сурагчдаа олон тэмцээн уралдаанд амжилттай бэлтгэн оролцуулж байсны дотор 2019 онд АНУ-ын “Intel International Science and Engineering Fair” уралдаанд хүүхдүүд нь шалгарч байжээ.

"Varkey Foundation" сангаас санаачилдаг Дэлхийн шилдэг багшийн шагналд 179 орны 10,000 багш нэр дэвшсэнээс Питер Табичи ялж сая ам.доллараар шагнуулсан юм. Шагналыг Эмиртийн угсаа залгамжлах хунтайж Хамдан бин Мохаммед аль Мактум гардуулжээ. Тус арга хэмжээг жүжигчин Хью Жэкмэн хөтөлсөн байна.

Шагналыг зохион байгуулагч "Varkey Foundation" сан нь дэлхий даяар боловсролын түвшний ялгааг арилгах зорилготой ажилладаг бөгөөд хүнд орчин нөхцөлд амжилт гаргаж байгаа багш нарыг тодруулан алдаршуулах, урам өгөх зорилготой.

Питер Табичи: “Алдаа гаргахгүйгээр суралцах боломжгүй. Суралцахгүйгээр өөрчлөгдөх боломжгүй. Африк тивээс удахгүй дэлхий дахинд нэрээ цуурайтуулах эрдэмтэн, инженер, бизнесмэнүүд төрөн гарах болно. Үүнд охидын оролцоо ч их байх болно. Багшийн хувьд би залуу үеийн итгэл найдвар, ухаан, авьяасыг чиглүүлэгч байхаа амлаж байна.” гэжээ.