Хүний бие организмын нууц тайлагдашгүй гэдгийг энэ түүх харуулж байна. Их Британийн Шелли, Роб Уолл хоёр хэнз хүүхэдтэй болж Ноа Уолл гэж нэрийдсэн байна. Харамсалтай нь бүсгүйг бүр жирэмсэн байхад л эмч нар ураг огт тархигүй болохыг мэдэж, тэдэнд жирэмслэлтийг зогсоох саналыг таван ч удаа тавьжээ.

Шинжилгээ, зургуудаас үзэхэд хүүгийн гавал дахь тархины хэмжээ байх ёстой хэмжээний дөнгөж хоёр хувь л байлаа. Үүнээс үүдээд эмч нар хүү ч амьдарч чадахгүй, төрмөгцөө амь алдана, амьдарлаа гэхэд ямар ч чадваргүй тахир дутуу хүн болно, ийм болохоор жирэмслэлтийг зогсооё гэж эцэг эхэд нь хэлсэн ч олон жилийн турш хүүхэд мөрөөдөж байсан хос зөвшөөрсөнгүй, хүүхдээ төрүүлсэн байна.

Тэд “Хэрэв бид залуу байсан бол эмч нарын зөвлөгөөг дагах л байлаа. Ганцхан бид хангалттай насжуу хүмүүс болохоор хүүхдийнхээ зулайг үнэрлэхийг үнэхээр хүсч байсан. Тэгээд ч бид аливааг өөдрөгөөр харж, Ноадаа амьдрах боломж өгөхөөр шийдсэн юм” гэж ярьж байна.

Эмч нар жаал хүүгийн энэ өчүүхэн тархи төрсний дараа улам устаж үгүй болно гэж оношилж байлаа. Тэгээд амь алддаггүй юм гэхэд хүү өөрөө бие даан хооллож, сууж, ч чадахгүй болно гэж сэтгэл зовниж байлаа.

Ингээд нэгэнт эцэг эх нь жирэмслэлтийг таслахаас татгалзсан болохоор эмчийн байнгын хяналтад байж төрүүлээд, хүүхдийг эмнэлгийн хяналтад байлгажээ. Жаал хүүг гурван настай байхад нь авсан шинжилгээгээр тэр хугацаанд жаал хүүгийн тархи төлжиж хэвийн хэмжээний 80 хувь болсон байсан нь эмч нарыг бүр гайхашруулжээ. Зарим эмчийн хэлж байгаагаар хүүгийн тархи хэт жаахан л болохоос эрүүл байсан, тэгээд толгойд нь дэмжлэг үзүүлэгч суурилуулсан нь нөлөөлж төлжүүлсэн байх гэнэ.

Ийнхүү анагаах ухааны түүхэнд урьд нь тохиолдож байгаагүй гайхамшиг тохиож эмч нарын гаргаж байсан бүхий л таамгийг Ноа хүүгийн амьдрал бүрэн няцаах нь тэр. Өнөөдөр Ноа зургаан нас хүрч маш сайн ярьж, бас серфи дээр гулгаж сурах гэж байна.

Гэхдээ хүү бүр төрөхөөсөө өмнө л нуруу, нугасны гэмтэлтэй байснаас өнөө хүртэл өөрөө бие даан явж чаддаггүй байна.

Одоо Шелли, Роб хоёр хүүгээ Австралийн сэргээн засах тусгай эмнэлэгт эмчлүүлж байна. Тэнд Ноа бусдын дэмжлэггүйгээр сууж, бас серфигээр гулгаж сурах гэж хичээллэж байна. Тэр өөрөө бие даан босож, явж, усны цана дээрээ зогсож чаддаг болохыг мөрөөдөж байна.

Эмчилгээний хувьд одоо эмч нар түүнд нейрофизикийн эмчилгээ буюу мэдрэлийн шингэн, хөдөлгөөний дасгал хийж байна. Хөдөлгөөний дасгалуудыг насанд хүрэгсдэд хийх ёстой ч эцэг ,эх нь эмч нарт итгэж ийм дасгал хийлгэж байгаа гэнэ.

Хүний биеийн энэ хөгжил, Британийн эмч нарыг үнэхээр гайхшируулан алмайруулж байна. “Түүний хийлгэсэн энэ эмчилгээнүүд тархины чадварыг сайжруулж, улмаар мэдрэлийн тогтолцоог нь залруулан эрүүлжүүлж байгаа гэж ойлголоо” гэж эцэг Ноа нь ярьжээ.

Х.Өлзийбаяр