Венесуэлийн Ерөнхийлөгч Николас Мадуро гадны улсаас тусламж авахгүй гэж өнгөрсөн долоо хоногт мэдэгдсэн билээ. Харин энэ эсэргүүцлийг үл харгалзан ирэх амралтын өдрүүдэд Бразил улсаас тус улстай залгаа хил рүү хүмүүнлэгийн тусламж илгээнэ гэж Бразилын ерөнхийлөгчийн хэвлэлийн алба мэдээллээ.
“Тусламжийг хүргэх, тараах ажлыг Венесуэлийн сөрөг хүчний удирдагч Хуан Гуайдо зохион байгуулж байгаа” гэж дээрх мэдэгдэлд цохон тэмдэглэсэн байна.
Ерөнхийлөгч Николас Мадурогийн хувьд Венесуэлд хямрал нүүрлэсэн гэх мэдээллийг үгүйсгэж, тусламжийн үйл ажиллагаа нэмэгдэж буйг АНУ-ын зохион байгуулсан “шоу” хэмээн нэрлэж байгаа юм.
Тодруулбал, ерөнхийлөгч Николас Мадуро АНУ-аас Венесуэл рүү илгээх тусламжийг хүлээн авахаар төлөвлөж байсан Нидерландын Куракао аралтай залгаа улсынхаа хилийг хаагаад байгаа юм.
Куракао аралтай агаар болон усаар хиллэдэг хилийг хаасан тухай Венесуэлийн цэргийн хүчний өндөр албан тушаалтан Владимир Кинтеро мягмар гаригт албан ёсоор мэдэгдсэн бөгөөд үүнээс өөр дэлгэрэнгүй мэдээлэл өгөөгүй байна.
Тус улсын цэргийн хүчин Ерөнхийлөгч Николас Мадурог дэмжинэ гэдгээ дахин батлаад, улсын эрхийг Хуан Гуайдод шилжүүлэн өгөх АНУ-ын Ерөнхийлөгчийн уриалгад татгалзсан хариу өгчээ.
Цэргийн албан хаагчид урьд нь Колумби улстай залгаа хилээр АНУ-ын тусламж нэвтрэхээс сэргийлж, гүүрний зорчих хэсэгт нефть тээврэлэгч болон ачааны чингэлгүүд байрлуулж байсан билээ.
