Грекийн Александроуполийн Ерөнхий эмнэлгийн их сургуулийн чих, хамар, хоолойн эмч авлига авсан хэргээр ажлаас халагдсан байна. Үндэсний эрүүл мэндийн үйлчилгээний сахилга батын төв хорооноос тус эмчийг авлига авснаас хойш гурван жилийн дараа ийм шийдвэр гаргаснаа зарлажээ.
Авлига өгсөн өвчтөн өөр эмчээр амжилттай хагалгаа хийлгэсэн гэж мэдэгдсэнээр энэ хэрэг олны өмнө ил болжээ. Тус эмнэлгээс “Гомдол гаргагч хэзээ ч айх ёсгүй. Шударгаар ажлаа хийдэг, чадварлаг эмч нар олон бий. Хээл хахууль нэхсэн, авсан л бол уучлалгүй шийтгэгдэнэ” гэж мэдэгджээ. Харин уг хэрэг яагаад удаан хугацааны дараа шийдвэрлэгдсэнийг тайлбарлаагүй байна.
Грект эмч нар өвчтөнөөс хахууль нэхэх, өвчтөн ч сайн эмчилгээ үйлчилгээ авахын тулд “гар цайлгах” хэлбэрээр “факелаки” хэмээн нэрлэгддэг дугтуйтай мөнгө өгөх явдал түгээмэл байдаг ч ял сонссон эмчийн тоо маш цөөн байдаг аж.
