Өнгөрсөн амралтын өдрүүдэд Хятадын Статистикийн товчооны нийтэлсэн мэдээнд хүн амын өсөлт мэдэгдэхүйцээр буурсныг өгүүлжээ. Өнгөрсөн онд төрсөн хүүхдийн тоо нь хоёр саяар бууран 1949 онд БНХАУ байгуулагдсан үеэс хойших хамгийн доод төвшинг үзүүлсэн байна. 

Хятад улс 2016 онд нэг хүүхэдтэй байх бодлогоо зогсоож, гэр бүлүүдэд хоёр хүүхэдтэй болохыг зөвшөөрсөн юм. Амжиргааны өртөг өндөр болж буйгаас хүн амын шинэ бодлого төрөлтөд нөлөөлсөнгүй. Төрөлтийн төвшин 2018 онд 1000 хүн тутамд 10,94 хүүхэд хүртэл унав. Өмнөх жилд нь үзүүлэлт 12,43 байжээ. 

2018 онд төрсөн хүүхдийн тоо өмнөх жилийнхээс хоёр саяар буурч 15,23 сая байв.

Өнөөдөр тус орны төрөлтийн төвшин 1949 оноос хойш хамгийн бага байгаа ба Хятадын хүн ам 1,4 тэрбум гэсэн тоотой.

“Хятадын нийгэм эдийн засгийн шинэчлэлийн хэдэн арван жилд Хятадад шинэ үеийнхэн өслөө. Хэзээ нэгэн цагт чухал байсан гэрлэлт, хүүхэд төрүүлэлт нь шинэ үеийнхэнд ямар ч учир утгагүй болсон” хэмээн Хятадын хүн ам зүйн бодлогын хямралыг Калифорнийн их сургуулийн профессор Ван Фэн тайлбарлажээ.

Бие даасан мэргэжилтэн Хе Яху тэр болгоомжлолыг давтан “Төрөлт буурснаар хүн амын хөгшрөлт ноцтойгоор нэмэгдсэн. Гэр бүл жижгэрч ахмадуудын асрамж багасаж байна. Үүний зэрэгцээ ажил эрхэлдэг хүмүүст ачаалал улам нэмэгдэж байна” гэжээ.

Гурван жилийн өмнө гэр бүлд нэг хүүхэдтэй байх бодлогоо цуцлан Хятад дэлхийг алмайруулж байлаа. Тэр бодлого нь эхнээсээ янз бүрээр шүүмжлэлд өртөж байсан юм. Хятадын Иргэний шинэ хууль 2020 онд шинэчлэгдэнэ. Түүнээс гэр бүл төлөвлөлтийн талын бүхий л  заалт хасагдах ажээ.

Хятадыг ээлжит “Япон” болон хувирах нь эдийн засагт нь хүнд үр дагавартай. Хятадын хүн амын 0-24 насныхан 1950 оноос хойш 1991 оны оргил үе хүртлээ 300 саяар нэмэгдсэн байв. Түүнээс хойш Хятад залуусын тоо 176 саяар буурсан нь хүүхдийн тоо 30 хувиар унасан гэсэн үг болж байна.

М.Цогт