''Ангууч'' нэрээр олны дунд танил болсон фото модель, жүжигчин, тамирчин Б.Баттөр хүүхэд хамгааллын чиглэлээр үйл ажиллагаа явууладаг “Ид шидийн орон” төсөлд 3000 доллар хандивлажээ. 

Тэрбээр өнгөрсөн амралтын өдрүүдэд Монголд анх удаа зохиогдсон “Mongol Fighting Championship” олон улсын тэмцээнд амжилттай оролцож, Казахстаны тамирчин Хабдулла Аллитай сонирхолтой тоглолт үзүүлсэн билээ. Түүний уг тэмцээнд үзүүлсэн тоглолтыг "Mogul Traders Club"-ийн зүгээс 5000 ам.доллароор үнэлжээ. 

Харин тэрээр шагналынхаа 3000 долларыг "Ид шидийн орон 2" төсөлд хандивласан байна.

"Лантуун Дохио" төрийн бус байгууллага нь Хүүхэд хамгааллын чиглэлээр “Ид шидийн орон” төслийг амжилттай хэрэгжүүлсэн бөгөөд, одоо “Ид шидийн орон-2”  цогц төвийн хоёр дахь төслөө эхлүүлсэн байгаа аж. Уг төслийг дэмжиж "Энержи Ресурс" компани нийт шаардлагатай санхүүжилтийн тэн хагасыг буюу 740 сая төгрөгийг хандивласан билээ. 

Энэ талаар "Лантуун дохио" ТББ-ын тэргүүн Г.Ганжавхлан фэйсбүүк хуудаснаа "За Монголчууд аа, кофешоп дээрээ сууж байтал гэнэтийн ийм зүйл боллоо. "Mogul Traders" клуб, Ангуучийн тулааныг үнэлж 5000 ам.доллараар дэмжсэн бөгөөд, тэд үүнээс 3000 ам.долларыг нь шууд "Ид шидийн орон-2" төв баригдахад хандивлалаа. Хамтдаа сайхан кофе ууж, Ид шидийн оронд хүүхдүүдийн төлөө үлгэр дууриал болсон ямар сайхан зүйлсийг хийж болох талаар ярилцлаа. Мундаг залууст амжилт хүсье! Ямар ч талаас нь харсан энэ бол маш сайхан үйл, хоншоор, том хувь нэмэр, ийм сайхан мэдээг гоё сайхан үгсээр шэйрлэж, сайхан урам зориг нэмээрэй. Battur Batbaatar Bat Erdene Boldbaatar нартаа баярлалаа! Сайхан өдөр байна" хэмээсэн байна. 

Залуу үедээ үлгэр, дуурайлал болж ирээдүй болсон бяцхан үрсдээ ид шид бүтээлцэж байгаад баярлалаа.  Ангуучдаа урлаг, спортын амжилт хүсэн ерөөе!