Парламентын Нийгэмлэгүүдийн танхимын нэгдүгээр сарын 15-нд явагдсан санал хураалтаар 432 депутат Тереза Мэйн тус орныг ЕХ-ноос гаргах хуулийн төслийн эсрэг санал өгсөн бол түүнийг дөнгөж 202 депутат дэмжив.

"Sky News" телевизийн дүгнэлтээр, Английн парламентын доод танхимын түүхэнд засгийн газрын ийм ноцтой ялагдал хүлээж байгаагүй ажээ. Өмнөх ийм сөрөг дээд амжилт 1924 онд Жеймс Рамсей Макдональдын засгийн газрын хуулийг буцаахад 166 саналын зөрөөтэйгээр тогтоогдож байжээ.

Санал хураалтын дүнг зарласны дараа Жереми Корбины толгойлсон Лейборист нам парламентын доод танхимд өнөөгийн засгийн газарт итгэл үзүүлэх эсэх талаар санал хураах төслийг өргөн барьжээ. Энэ асуудлаар лхагва гаригт санал хураахаар болсон. Энэ санал хураалт явагдаж дуусахад Тереза Мэйн засгийн газар 19 саналын давуутайгаар 325 санал авч үлдэж чадсан байна.

Тереза Мэй санал хуралтуудын дараах хоногуудад огцорч болох талтай. Мэйн төсөл  зад ниргүүлсэн нь түүний огцрох магадлалыг нэмэгдүүлж байгаа билээ хэмээн "Deutsche Bank" дүгнэжээ.

Консерватив намын төлөөлөгч нар Тереза Мэйн төлөө өгсөн саналаа эргүүлэн  татах боломж байгаа. Хэрэв тэгвэл нам нь Ерөнхий сайдыг  солих шинэ хүнийг гаргаж ирэх ёстой. Консерваторууд шинэ лидерт дэвшүүлэх хүнээ тохиролцож чадахгүй бол Мэй огцрохгүй байж болох ч лидерийн төлөөх тэмцэл газар авна.

Хэрэв Мэй засгийн газраасаа дэмжлэгтэй байх юм бол түүнд болон засгийн газарт нь Brexit стратегийг нэгдүгээр сарын 21 гэхэд шинэчлэн парламентад танилцуулах боломж гарч ирнэ.

Мэй ийм тохиолдолд Лиссабоны ЕХ-ны гэрээний 50-р заалтыг биелүүлэх хугацааг 2-4 долоо хоногоор сунгахыг Брюсселиэс шаардан дахин нэг удаа хэлэлцээр явуулах боломжийг хайна. Брюссель 50-р заалтын талаар арай уян бодлого барьж магадгүй. Тэр нь хамгийн эерэг хувилбар болох бөгөөд түүнд зах зээл харьцангуй өндөр итгэлтэй хандах болно.

Энэ нөхцөлд Тереза Мэйн өрсөлдөгч нар Brexit-ээр хоёр дахь бүх нийтийн санал асуулгыг шаардаж магадгүй ба Засгийн газрын бүх хүч санал асуулгын хугацааг тогтооход чиглэгдэн Брюссельтэй тохиролцоо хийх асуудал хойш тавигдана. Энэ тохиолдолд 50-р заалтыг биелүүлэх асуудал долдугаар сар ба түүнээс хойш хугацаа хүртэл хойшлох шаардлага гарна.

Мэй огцорсон нөхцөлд парламентын сонгууль дахин явагдаж магадгүй. Хэрэв консерваторууд хоёр долоо хоногийн дотор шинэ лидерийг дэвшүүлж, шинэ засгийн газраа байгуулж чадахгүй нөхцөлд хуулийн дагуу сонгууль шинээр явагдах ёстой. Энд бас л 50-р заалтын биелэлтийг хойшлуулах шаардлагатай.

Гэхдээ Брюссельтэй ямар нэгэн гэрээгүйгээр явагдах Brexit нь хамгийн муу хувилбар. Хэрэв парламентын консенсус төстэй гэрээгээр хийгдэхгүй бол эсвэл Ерөнхий сайд Мэй парламентыг хяналтдаа оруулж чадахгүй, мөн Засгийн газарт итгэл үзүүлэх эсэх нь дэмжлэг олохгүй бол тийм хувилбар байж болох юм.

Өнөөдөртөө хэрэв Тереза Мэй Европын холбооны удирдлагатай тохиролцож чадвал Их Британийн ЕХ-ноос гарах хугацааг сунгах хувилбар илүү магадлалтай харагдаж байна. Харин Брюссель ЕХ-ноос Их Британийн гарах тухай гэрээний нөхцлийг өөрчлөхгүй гэж мэдэгдээд байгаа.

М.Цогт