Дорноговь аймгийн Нэгдсэн эмнэлгийн Мэс заслийн тасгийн хамт олон гамма хадаасаар түгжих хагалгааг орон нутагт амжилттай нэвтрүүллээ.

Тодруулбал, дунд чөмөгний их, бага эргүүлэг дайрсан болон дунд чөмөгний дээд 1/3 хэсгийн хугарлыг “Гамма” хадаасаар түгжих мэс заслыг энэ оны 05 дугаар сарын 05-нд амжилттай хийж, орон нутагт нутагшуулах ажлын эхлэлийг тавьсан байна. Гамма хадаасаар түгжих хагалгаа (Gamma Nail Fixation) нь ихэвчлэн гуяны дээд хэсэг, түнхний үений орчмын хугарлыг (гуяны хүзүү болон их эргүүлгийн орчмын хугарал) эмчлэхэд ашигладаг, ясны дотуур бэхлэгддэг хадаасны нэг төрөл аж.

"Энэхүү дэвшилтэт арга нь өвчтөнд үзүүлэх тусламж үйлчилгээний чанар, хүртээмжийг нэмэгдүүлэхийн зэрэгцээ Улаанбаатар хот руу тээвэрлэгдэх шаардлагыг бууруулах чухал ач холбогдолтой.Цаашид орон нутагт орчин үеийн мэс заслын тусламжийг хөгжүүлэх, нутагшуулах ажлыг үе шаттайгаар өргөжүүлэх боломж бүрдэж байна" хэмээн аймгийн Нэгдсэн эмнэлгээс мэдээлэв.

Дээрх мэс заслыг Монгол Улсын хүний гавьяат эмч Х.Эрдэнэбулган, гэмтлийн эмч Б.Гүндцамба, Л.Бүнчин, мэс заслын сувилагч Ч.Адъяасүрэн, мэдээгүйжүүлгийн эмч Т.Гантамир, мэдээгүйжүүлгийн сувилагч О.Уранчимэг нар хийжээ.