Apple компанийн ерөнхий захирал Тим Күүк ТУЗ-ийн даргын албан тушаалд томилогдож, түүний оронд Жон Тернус ажиллахаар болсон тухай компанийн ТУЗ-ийн удирдлага мэдээллээ.
Энэ шийдвэр 9 дүгээр сарын 1-нээс хэрэгжиж эхэлнэ. ТУЗ-ийн гишүүд Аппаратын инженерчлэлийн асуудал эрхэлсэн тэргүүн дэд ерөнхийлөгч Жон Тернусыг компанийн ерөнхий захирлаар томилохыг санал нэгтэйгээр дэмжсэн байна.
Тим Күүк СЕО-гийн үүргийг энэ зуныг дуустал гүйцэтгэх бөгөөд дараа нь ТУЗ-ийн даргаар томилогдож, компанийн дэлхий даяар тархсан салбаруудтай хамтран ажиллах асуудлыг хариуцна. Тэрбээр 1998 оноос Apple-д ажиллаж эхэлсэн бөгөөд 2011 онд компанийг удирдах болсон юм. Түүний удирдлага дор тус компани дэлхийн зах зээл дэх байр сууриа үлэмж бэхжүүлсэн бөгөөд зах зээлийн үнэлгээ нь 350 тэрбумаас 4 их наяд доллар хүртэл өсөж, жилийн ашиг нь бараг 4 дахин нэмэгдэж, 416 тэрбум долларт хүрсэн байна. Өнгөрсөн хугацаанд Apple компани Apple Watch, AirPods, Apple Vision Pro зэрэг шинэ бүтээгдэхүүнүүдээ гаргаж, iCloud, Apple Pay, Apple TV, Apple Music зэрэг үйлчилгээнүүдээ эрчимтэй хөгжүүлжээ. Өнөөдөр тус компани үйлчилгээний бизнесээс жилд 100 тэрбум долларын орлого олж байна.
Шинэ СЕО Ж.Тернус 2001 оноос Apple-д ажиллаж байгаа бөгөөд 2021 онд аппаратын инженерчлэл хариуцсан тэргүүн дэд ерөнхийлөгчийн албан тушаалд томилогджээ. Өнгөрсөн хугацаанд тэрбээр iPhone, Mac, iPad, Apple Watch зэрэг шинэ бүтээгдэхүүнүүдийг зохион бүтээх, хөгжүүлэх ажлыг хариуцаж байснаас гадна AirPods, iPhone 17, Pro, Pro Max, iPhone Air зэрэг шинэ бүтээгдэхүүнүүдийг гаргахад оролцжээ.
Ж.Тернус бүтээгдэхүүний найдвартай байдал, экологид ээлтэй байдлыг сайжруулахад онцгой анхаарал хандуулж байв. Түүний удирдлага дор дахин боловсруулсан хөнгөн цагаан, 3D хэвлэлтийн титан зэрэг шинэ материалуудыг гарган авснаар төхөөрөмжүүдийг засварлах боломж нэмэгдсэн юм.
