Беларусийн теннисчин Арина Соболенко дэлхийн спортын “Лауреус” академиас шилдэг эмэгтэй тамирчинд олгодог 2025 оны шагналыг хүртлээ. Шагнал гардуулах ёслол өчигдөр Мадрид хотод болжээ.

2025 оны шилдэг эрэгтэй тамирчны шагналыг Испанийн теннисчин Карлос Алькарас хүртсэн байна.

Өдгөө 27 настай Соболенко 2024 оны 10 дугаар сараас хойш дэлхийн чансааг тэргүүлж байгаа бөгөөд 2025 онд АНУ-ын аварга шалгаруулах нээлттэй тэмцээнд түрүүлсэн юм. Тэрбээр Эмэгтэй теннисчдийн холбооны ивээл дор болдог тэмцээнүүдийн ганцаарчилсан төрөлд нийтдээ 24 удаа түрүүлсэн байна. Эдгээрээс Их дуулгын тэмцээнүүдэд 4 удаа буюу Австралийн аварга шалгаруулах нээлттэй тэмцээн /2024, 2025/, АНУ-ын аварга шалгаруулах нээлттэй тэмцээнд /2024, 2025/ тус бүр хоёр удаа аваргалжээ.

Дэлхийд нэртэй томоохон компаниуд, олон улсын сангууд 1999 онд "Лауреус" шагналыг бий болгосон байна. Шагналд нэр дэвшигчдийг эхлээд спортын сэтгүүлчид тодруулах ба дараа нь “Лауреус” академийн 50 гишүүн буюу өмнөх үеийн алдартай тамирчид саналаа өгдөг.

Оросын тамирчдаас 2007 ба 2009 онуудад уг шагналыг тулгууртай харайлтын тамирчин Елена Исинбаева гол номинацид хүртэж байв. Мөн “Оны чухал нээлт” ангилалд теннисчин Марат Сафин 2001 онд хүртжээ.