"Монголын эдийн засгийн төлөв тогтвортой, эерэг байгаа ч тодорхой бус байдал нэмэгдсээр байгаа"-г Дэлхийн Банкны Монгол дахь суурин төлөөлөгч Таехюн Ли Монгол Улсын эдийн засгийн тойм тайланг танилцуулах үеэрээ онцлов.

Тэрбээр "Эдийн засгийг төрөлжүүлж, өрсөлдөх чадварыг нэмэхийн зэрэгцээ, гадаад сөрөг шалтгаан үргэлжлэх тохиолдолд макро эдийн засгийн тогтвортой байдлыг хадгалах, эмзэг бүлгийн өрхийг хамгаалах нь бодлогын тулгамдсан асуудал болох"-ыг тэмдэглэлээ.  

Монголын эдийн засгийн тойм тайлангийн сүүлийн дугаарт дурдсанаар, уул уурхай, хөдөө аж ахуйн үйлдвэрлэл 2025 онд гүйцэтгэл сайн гарсан бол энэ онд тогтворжиж, эдийн засаг 5 хувиар өсөх төлөвтэй байгаа ажээ.

Дэлхийн эдийн засагт худалдааны тасалдал, геополитикийн зөрчилдөөн хурцадмал байсан ч монголын эдийн засгийн өсөлт өнгөрсөн онд 6.9 хувьтай гарсан. Хөдөө аж ахуйн салбар сэргэж, уул уурхай, тэр дундаа үндэсний томоохон уурхай “Оюу толгой”-н зэсийн баяжмалын үйлдвэрлэл эрчимтэй тэлсэн нь нүүрсний олборлолт саарсан сөрөг нөлөөг саармагжуулсан байна. Барилга, аж үйлдвэрлэл зэрэг бусад салбар идэвхжиж байсан бол худалдаа, үйлчилгээний салбарынх харьцангуй сул байв. Экспортын орлого сайн байж, өрхийн орлого тогтвортой нэмэгдсэнээр хувийн хэрэглээний өсөлт харьцангуй их түвшинд хадгалагджээ. Нөгөө талаас хүнс, эрчим хүчний үнэ нэмэгдсэн нь инфляц 2024 оны дундаж 6.8 хувиас 2025 онд 8.6 хувьд хүрч өсөх гол шалтгаан болов. Дунд хугацаанд дэд бүтцийн томоохон төслүүд үргэлжлэх, мөн дотоод эрэлт харьцангуй тогтворжих хүлээлттэй байгаа тул эдийн засаг 2027-2028 онд дунджаар 5.5 орчим хувиар нэмэгдэх төсөөлөлтэйг ахлах эдийн засагч Хосе Луис Диаз Санчез тодотголоо. 

Гэвч эдийн засгийн төлөвийг сааруулж болзошгүй сөрөг эрсдэл давамгайлсан хэвээр байна.

Гадаад орчны хувьд олон улсын худалдааны төлөв тодорхойгүй хэвээр, Ойрх Дорнодын мөргөлдөөн удаан үргэлжлэх тохиолдолд монголын эдийн засгийн гадаад эрэлт сулрах, түүхий эдийн экспорт багасах, үйлдвэрлэлийн зардал, хэрэглээний үнэ нэмэгдэх, мөн өсөлт удаашрах эрсдэлтэй.

Мөн төсвийн зардал хүлээлтээс давж нэмэгдвэл ДНБ-ий өсөлтийг богино хугацаанд дэмжих ч гадаад тэнцвэрийг алдагдуулж, инфляцыг эрчимжүүлж болзошгүйг эдийн засагч Б.Ундрал хэлж байв.

Дээрх тайланд эдийн засгийн дархлааг бэхжүүлж, төрөлжүүлэх ач холбогдлыг онцолжээ. Тухайлбал, өрсөлдөх чадварыг нэмэхийн тулд дэд бүтцийн хоцрогдлыг арилгах, нэн ховор ашигт малтмалын салбарыг хөгжүүлэх, гамшгийн бэлэн байдал, уур амьсгалын өөрчлөлтийг тэсвэрлэх чадварыг бэхжүүлэх нь чухлыг дурдсан байна. Улаанбаатар хотод аж ахуйн нэгж, иргэд, хөдөлмөр эрхлэгчид төвлөрөх нь хотын бүтээмжийг нэмж, эдийн засгийн боломжийг бүрдүүлж байгаа ч хэт төвлөрөл нь эдийн засгийн эерэг үр нөлөөг хязгаарлаж болзошгүй тул хотын хөдөлгөөний үр ашгийг дээшлүүлж, нийслэл болон бусад бүсэд илүү тэнцвэртэй хөгжлийг дэмжих нь чухал байгаа ажээ.