Сүүлийн жилүүдэд 20 хүртэлх насныхны үр хөндөлт нэмэгдэж байгаа тоо баримт байна.

Тодруулбал, Монгол Улсын өсвөр насны охидын төрөлтийн түвшин 2020 оны ДЭМБ-ын статистикаар тухайн насны 1000 охидод харьцуулахад 26.9 байгаа нь дэлхийн дунджаас 15.6 хувиар доогуур байгаа ч Номхон далайн баруун эргийн бүсийн дунджаас 12.5 хувиар өндөр үзүүлэлттэй байна.

Энэхүү үзүүлэлт нь Зүүн Азийн орнуудын өсвөр насны охидын төрөлтөөс 3 дахин их байгаа гэх судалгаа гарчээ.

Улсын хэмжээнд 2025 оны жилийн эцсийн байдлаар нийт 11797 эмэгтэй үр хөндөх мэс ажилбарыг хийлгэсэн байна. Энэ нь өмнөх оны мөн үеэс 879 тохиолдлоор буурсан үзүүлэлт боловч, 623 тохиолдол буюу 5.3 хувийг өсвөр насныхны үр хөндөлт эзэлжээ.

Хүүхдүүд нэг нэгэндээ буруу ташаа мэдээлэл өгөх, цахим орчноос янз бүрийн баталгаагүй мэдээлэл авснаар хүсээгүй жирэмслэлтээс сэргийлэхийн тулд 72 цагийн эмийг дур мэдэн хэрэглэж байна.

Энэ нь жирэмслэлтээс хамгаалах арга хэрэгсэл огт биш. Зайлшгүй тохиолдолд ууж хэрэглэдэг эм.

72 цагийн эмийг жилдээ дээд тал нь 1-2 удаа хэрэглэх бөгөөд түүнээс илүү хэрэглэсэн тохиолдолд охидын бие махбодид эмгэг өөрчлөлт илэрнэ.

Манай улсын эмийн бүртгэлд жирэмснээс хамгаалах, 72 цагийн дотор уудаг "Постинор", "Прегнон", "Мадонна" гэсэн гурван эм бүртгэгдсэн байдаг. Эдгээр эм нь Унгар, Энэтхэг, Тайланд улсаас орж ирдэг бөгөөд хоол боловсруулах замаар бүрэн шимэгдэж, хэрэглэснээс хойш 2 цагийн дараа цусны плазм дахь концентраци нь дээд хэмжээндээ хүрдэг байна. Үүний дараа элгэнд задарч 60 хувь нь бөөрөөр, 40 хувь нь өтгөнөөр гадагшилдаг.

"Постинор", "Прегнон", "Мадонна" эмийн ерөнхий үйлчлэл нь өндгөвчнөөс өндгөн эс чөлөөлөгдөx явцыг саатуулдаг. Хэрэв өндгөн эс чөлөөлөгдсөн байвал өндгөн эс рүү эр бэлгийн эс нэвтрэн ороx явцыг саатуулах, үр тогтсон өндгөн эсийг умайн xананд бэxлэгдэx явцыг зогсооx үйлчилгээ үзүүлдэг.

Хоол боловсруулаx эрxтэн болон элэгний хурц, архаг өвчнүүдийн үед, чихрийн шижин, даралт өндөр, зүрхний өвчтэй, хөхний хавдартай болон өмнө нь хавдар тусаж байсан бол 72 цагийн эмийг хэрэглэхийг хориглодог.

Хэдийгээр дээр дурдсан өвчингүй ч эмийн найрлага дахь орцонд мэдрэг бол дотор муухайрах, сарын тэмдгийн мөчлөг богиносох, цусархаг ялгадас гарах зэргээр эмийн гаж нөлөө илэрдэг. Дээрх гаж нөлөө илэрсэн тохиолдолд уг эмийг хэрэглэж болохгүй.

ДЭМБ-ын зөвлөснөөр постинор эмийг зургаан сард ганцхан удаа л уух заавартай. Гэтэл эмийн сангуудад, хэн дуртай нь худалддагаас болоод охид, эмэгтэйчүүдийн дунд замбараагүй хэрэглээ бий болж байна.

Иймд өсвөр насны охид дааврын эмийг дур мэдэн хэрэглэхгүй байх, хэрвээ хүсээгүй жирэмслэлт болбол заавал мэргэжлийн эмчид хандаж байхыг анхааруулъя.

ЭБЭ-ийн их эмч А.Гэрэлмаа