Боксын насанд хүрэгчдийн Ази тивийн аварга шалгаруулах тэмцээн 10 дахь өдрөө “Аса арена”-д үргэлжилж байна.

Эмэгтэйчүүдийн 10 жингийн финалын тэмцээн өнөөдөр эхэллээ. Хамгийн эхэнд 48 кг-ын жингийн тулаан болж, ААШТ-ий анхны алтан медальтан тодорсон юм. Тус жинд спортын мастер Э.Номуундарь Энэтхэгийн тамирчин Минакши Минакшитай тулалдав. Улмаар хажуугийн шүүгчдийн санал нэгтэй шийдвэрээр Энэтхэгийн тамирчинд ялалт өгчээ. Ингэснээр манай тамирчин анх удаа ААШТ-д оролцохдоо мөнгөн медалийн эзэн болж байна.

Түүний хувьд “Мон Алтиус” дээд сургуулийн хоёрдугаар дамжааны оюутан. Тэр өдгөө 21 настай бөгөөд ААШТ-д тулалдаж буй хамгийн залуу тамирчин юм. Үндэсний шигшээ багийн тамирчин, спортын мастер Э.Номундарь өмнө нь 2024 онд Казахстаны Астана хотод болсон сонирхогчдын боксын залуучуудын ААШТ-ээс мөнгө, Алматыгийн олон улсын тэмцээнээс хүрэл медаль хүртэж байжээ.

Манай улсын баг тамирчид одоогийн байдлаар нэг мөнгө, гурван хүрэл медальтай болов. Маргааш эрэгтэйчүүдийн 10 жингийн финалын тулаан болсноор ААШТ өндөрлөнө. Манай улсаас 55 кг-д олон улсын хэмжээний мастер Х.Билгүүнсайхан рингэнд гарна.