Баян-Өлгий аймаг дахь МСҮТ-д сүүлийн дөрвөн жил ажиллаж буй Швейцар улсын сайн дурын ажилтан Уолтрауд Курт хувиасаа 50 сая төгрөгийн хөрөнгө оруулалт хийж, сагсан бөмбөгийн стандарт талбай барих ажлыг эхлүүлжээ.
Тэрбээр өнгөрсөн жил тус сургуулийн 60 жилийн ойг угтан хувиасаа 20 сая төгрөг гарган цайны газрын хоол бэлтгэх өрөөг бүрэн засварласан бол энэ жил суралцагчдын чөлөөт цагаа зөв боловсон өнгөрүүлэх боломжийг нэмэгдүүлэх зорилгоор биеийн тамирын талбайг ашиглалтад оруулахаар ажиллаж байна.
Сургуулийн багш, суралцагчидтай хамтран хэрэгжүүлж буй эдгээр ажил нь хамтын оролцоо, бүтээлч сэтгэлгээг дэмжиж, сургуулийн хөгжилд чухал хувь нэмэр болж байна. Уолтрауд Курт нь тус сургуулийн сургалтын орчин, суралцагчдын суралцах боломжийг сайжруулахад үнэтэй хувь нэмэр оруулж байгаад тус сургуулийн хамт олон талархал илэрхийллээ.
