Ардчилсан намын Үндэсний бодлогын хорооны 68 дугаар хуралдаан өнөөдөр эхэллээ.    

Хуралдааныг УИХ-ын гишүүн Ц.Туваан, Б.Жаргалан, Үндэсний бодлогын хорооны гишүүн Б.Отгонбат нар даргалж байна. Үргэлжлүүлэн ҮБХ-ны гишүүдийн бүрэн эрхийг батламжилж, Улс төрийн зөвлөлийн 2026 оны дөрөвдүгээр сарын 7-ны өдрийн хурлаас санал болгосон ҮБХ-ны хуралдаанаар хэлэлцэх асуудлыг танилцуулж батлуулав.

Хуралдааныг Ардчилсан намын дарга, УИХ дахь Ардчилсан намын бүлгийн дарга О.Цогтгэрэл үг хэлэхдээ, “Ардчилсан намын шинэчилсэн дүрмийг Улсын дээд шүүх бүртгэн авснаас хойш гурван сарын хугацаанд бид бүх шатандаа “Нээлттэй, Цэгцтэй” шинэчлэлийг өрнүүлж дотоод зохион байгуулалтаа бүрэн шинэчиллээ. Ардчилсан нам цаашид бодлого суурьтай, судалгаанд тулгуурласан, гишүүн төвтэй болно. Хувийн ашиг сонирхлоос илүү нийтлэг үнэт зүйл, зарчмыг дээдэлж чадвал нам жинхэнэ институт болж төлөвшинө. Институт болсон нам л тогтвортой бодлого хэрэгжүүлж, улс орны хөгжлийг урт хугацаанд чиглүүлж чадна. Түүнчлэн хөдөлмөрлөсөнд илүү боломж олгодог нам байх болно. Хүчээ зориулсан, зарцуулсанд нь илүү боломж олгодог байна. Ардчиллын шинэ тэмүүллээр жигүүрлэсэн анд нөхөд та бүхэндээ амжилт, ялалт, сайн сайхан бүхнийг хүсэн ерөөе. Давхар ялалтын төлөө хамтдаа хичээцгээе” хэмээв.

Ардчилсан намын Үндэсний бодлогын хорооны 68 дугаар хуралдаан үргэлжилж байна.

Ташрамд дурдахад, Ардчилсан намын ХVIII их хурал өчигдөр өндөрлөсөн. Их хурлаар намын бодлого, бүтэц зохион байгуулалт, цаашдын зорилтыг тодорхойлохоос гадна АН-ын дарга, УИХ дахь намын бүлгийн дарга О.Цогтгэрэл аймаг, дүүргийн намын дарга нарын бүрэн эрхийг албан ёсоор батламжилжээ.