Gen Z, Milennials, Boomers зэрэг үе хоорондын ялгааг ойлгох нь нийгмийн харилцаанд чухал үүрэг гүйцэтгэх болжээ. Үзэл бодол, үнэт зүйлийн хувьд онцлог, хүч түрэн гарч ирж байгаа Gen Z үеийн залуустай цагаан сар, уламжлалт баяр ёслолоо хэрхэн тэмдэглэн өнгөрүүлдэг тухай ярилцлаа.

П.Хүсэлбаатар: 20 айл дундаас 10 мянган төгрөг өгсөн ганц айлд их баярласан

Gen Z үеийн төлөөлөл Пүрэвжавын Хүсэлбаатартай ярилцлаа.

-Сайхан шинэлж байна уу. Даага далантай, бяруу булчинтай, онд мэнд тарган тавтай оров уу?

-Сайхан шинэлж байна аа.

-Цагаан сар таны хувьд ямар ач холбогдолтой баяр вэ. Битүүний өдрөө хэрхэн өнгөрөөдөг вэ?

-Цагаан сар бол өвөө, эмээ нар дээрээ очиж золгодог баяр юм. Өндөр настай ахмад буурлууд дээрээ зорин очдог. Ийм чухал ач холбогдолтой баяр. Жаахан залхуу сонсогдож магадгүй ч гэсэн битүүний өдөр идээд л, хэвтээд л, унтдаг байх даа. Миний хувьд цагаан сарын баярын хамгийн гоё зүйл нь бэлэг авах байдаг. Орсон гарсан хүний гарыг цайлгаж, алгыг дээш харуулдаг.

-Сар шинийн барилдаан үздэг үү?

-Би сар шинийн барилдаан их үзээд байдаггүй. Зун наадмаар л үзүүр түрүүний барилдаануудыг сонирхож үзэх гэж хичээдэг дээ. Хөдөө ногоон зүлгэн дээр барилдаж байгаа нь хиймэл зүлгэн дээр барилдаж байгааг үзэхээс илүү үзүүштэй байдаг.

-Цагаан сараар хөдөө, гадаа их явдаг уу. Ямар бэлэг авах хамгийн гоё вэ?

-Явдаг. Цагаан сарыг хөдөө тэмдэглэх илүү гоё, уужуу сайхан, учир нь илүү сайхан агаартай. Хотод нагаартахгүй. Түгжрэлгүй сайхан шүү дээ. Морио уначихна. Сүүлийн үед ажиглаад байхад хүмүүс айлд орж ирчихээд гар утсаа оролдоод л суугаад байх юм. Гар утсаараа тоглоод л суугаад байж болохгүй. Тэртэй тэргүй тоглохоос хойш ганц өдөр тархи, толгойгоо амраах хэрэгтэй. Бэлэг бол бэлэн мөнгө нь амар. Энэ жил би 20 айлд орлоо. Надад мөнгө өгөлгүй ихэнх айл оймс гэх мэт бэлэг өглөө. Хүний сайхан сэтгэлд баярлаж байна. Гэхдээ 20 айл дундаас ганцхан айл 10 мянган төгрөг өгсөн. Тэр айлд их баярласан шүү.

Н.Нямдолгор: TikTok, Instagram-д зургаа оруулж, “Цагаан сарын vibe” хуваалцана

Gen Z үеийн охидын төлөөлөл Н.Нямдолгортой ярилцлаа.

-“Сүрээр дарагч” хэмээх Гал морин жилийн Цагаан сараар сайхан шинэлж байна уу. Хэр их ач холбогдол өгч тэмдэглэж байна вэ?

-Сайхан шинэллээ. Манай гэр бүл цагаан сардаа багагүй ач холбогдол өгч тэмдэглэдэг. Энэ жил гэхэд ээж маань шинэ дээл, аав маань шинэ малгай авлаа. Уламжлал ёсоор идээ будаагаа зассан. Манай гэр бүл гурван үеэр хэвийн боовоо засдаг. Учир нь аав ээж маань харьцангуй залуу хүмүүс. Ээж бид хоёр энэ жил аав, ах хоёрт дайлан оёж өгсөн.

-Танай гэр бүл их ач холбогдол өгдөг бололтой?

-Манай ээж их хөдөлмөрч хүн болохоор аль 10, 20 хоногийн өмнө л бэлдээд эхэлдэг. Аав бол их тайван хүн болохоор өмнө хэдэн өдөр нь л жаал сандардаг. Ууцандаа л анхаардаг хүн дээ. Ээж бол бэлэг сэлт, идээ будаа гээд их завгүй. Ах бид хоёр тоос гөвдөг өдөр хамгийн их ачаалалтай байдаг. Хүмүүс ирээд хөшгөө угааж уу, тоосоо арчиж уу гэж нэг бүрчлэн харахгүй ч гэсэн тоосоо сайн гөвдөг.

-Таны хувьд энэ баяр хэр чухал вэ?

-Цагаан сар бол миний хувьд зүгээр нэг уламжлалт баяр биш, харин өнгөрсөн ба ирээдүйг холбосон нандин мөч. Өвөө эмээгээс эхлээд бүх дүү нартайгаа уулзана. Цагаан сар айл бүрд шинэ эхлэл, цэвэр ариуны бэлгэдэл авчирдаг гэж би хувьдаа боддог. Gen Z үеийн охин болохоор би нэг талаар сошиал орчин, хурдтай амьдралд дассан ч энэ баярын үеэр гэр бүлийн халуун дулаан уур амьсгалыг мэдрэхийг хүсдэг. Битүүний орой гэр бүлээрээ битүү хоол буюу хуушуур хийнэ. Мэдээж нэмээд TikTok, Instagram-д зургаа оруулж, “Цагаан сарын vibe”-ээ хуваалцана. Гэхдээ гүн утга нь лайк, шэйрээс илүү дурсамж болж үлдэнэ. Би Gen Z ч гэлээ, өв соёлоо хайрлаж, дараагийн үедээ бахархалтайгаар өвлүүлэхийг хүсдэг.

-Сайхан хэллээ. Хамгийн эхэнд хэнтэй очиж золгодог вэ?

-Шинийн нэгний өглөө гэртээ аавтайгаа хамгийн түрүүнд золгодог. Энэ жилийн хувьд гэр бүлээрээ Багануур орж, эмээтэйгээ золгосон. Эмээ маань хөдөө ихэвчлэн цагаан сараар байдаг ч энэ жил Багануурт бага хүргэнийдээ цагаан сар гаргасан. Тиймээс хөдөө явах хэрэг гарсангүй.

-Шинийн нэгний өглөө мөрөө гаргадаг уу?

-Гаргасан. Мөн манай аав жил бүр заавал мөрөө гаргадаг. Айл гэрийн ноён нуруу, эзэн хүн болохоор тэр байх.

Л. Оч-Эрхэс: Багшийнхаа гэрт анги, хамт олноороо цугларахнь халуун дулаан уур амьсгалтай, сайхан байна

Нийслэлийн Ерөнхий боловсролын 106 дугаар сургуулийн сурагч Лхагвадоржийн Оч-Эрхэстэй ярилцлаа.

-Сайхан шинэлж байна уу. Айл их хэсэж, алт мөнгө их цуглуулав уу?

-Сайхан шинэлж байна аа. Айл их хэсэж, алт мөнгө их цуглууллаа. Одоогоор цөөн хэдэн айлаар гэрийнхэнтэйгээ орлоо.

-Цагаан сар гэдэг баяр чиний хувьд ямар ач холбогдолтой вэ. Шинийн нэгний өглөө мөрөө гаргадаг уу?

-Нэг үгээр хэлбэл, амралтын өдөр. Мэдээж хамаатан садантайгаа уулзаж, золголт хийж, айл их хэсдэг. Ерөнхийдөө бууз идэж, цай, жүүс уух нь их дээ. Битүүний өдөр тавгийн идээгээ сайхан засна. Битүүний өдөртөө айл бараг хэсэхгүй, айлд хонохгүйгээр гэр гэртээ битүүртлээ иддэг. Мөрөө хааяа гаргана аа.

-Цагаан сарын шинийн 3, 4-ний шөнийн 02:00 цагт манай улсын цахим спортын Mongolz баг тоглолт хийсэн. Энэ тоглолтоо алгасалгүй үзсэн үү?

-Дэлхийн хоёрдугаарт бичигдэж байгаа Furia багийн эсрэг манай Mongolz тоглож байхад үзэлгүй яах вэ. Mongolz багийн тоглолтоо гурван цаг хүртэл үзээд унтсан. Хожсонд нь баяртай байлаа. Гэхдээ цагаан сарын баяраа тэмдэглэх нь амьд харилцааг бий болгодог.

-Хамгийн түрүүнд хэнийд очиж золгов?

-Шинийн нэгэнд хамгийн түрүүнд ахмад буурал, өвөө эмээ нартаа жил бүр очиж золгодог. Шинийн тавны өдөр Д.Сарангэрэл багшийнхаа гэрт ангиараа ирж золголоо. Ингэж багшийнхаа гэрт анги, хамт олноороо цугларах нь халуун дулаан сайхан уур амьсгалтай байна. Бөөндөө бужигнаад л. Манай багш бол далавчаа гээсэн сахиусан тэнгэр шиг хүн дээ. Энэ жил анх удаа цагаан сараар багшдаа ирж золголоо. Энэ боломжийг ашиглаад багшдаа хайртай шүү гэж хэлье.

Өдрийн сонин