Өнгөрөгч 2025 онд манай коксжих нүүрсний экспорт өмнөх онуудынхаа дээд амжилтыг эвджээ. Коксжих нүүрс төдийгүй "эрчим хүчний" гэгддэг хүрэн нүүрснээ ч сайн экспортолсон байна. Хэдийгээр нүүрсний экспорт 90 сая тоннод хүрсэн ч үнэ нь 40 хувь буурснаар 2024 онтой харьцуулахад гурван тэрбум ам.долларын алдагдал хүлээжээ. Гэсэн ч зэсийн баяжмалын экспорт 2,5 тэрбум ам.доллараар давсан нь экспортын орлого дутах аюулаас аварчээ. 

Зэсийн үнэ өсч буй энэ үеийг бид хэрхэн өөрсөддөө ашигтайгаар эргүүлэх вэ?

Энэ асуултад асуултад эдийн засгийн ухааны доктор Ч.Отгочулуу доорх хариултыг өгсөн байна.

-"Мэдээж "Оюутолгой" болон "Эрдэнэт" үйлдвэр дээрээ хөрөнгө оруулалтаа нэмж, үр ашгийг нь гаргах хэрэгтэй. Жишээ нь "Эрдэнэт" үйлдвэр 1,2 их наяд төгрөгийн өртэй ч бараг 7000 хүн ажиллуулж байна. Дэлхийн жишгээр иймэрхүү хүчин чадалтай үйлдвэрт үсрээд 700, дунджаар 300 хүн л ажилладаг. 

Нөгөө талд дэлхийд бүртгэлтэй 300 гаруй зэсийн уурхай, идэвхтэй үйл ажиллагаа явуулж байгаа 200 гаруй баяжуулах үйлдвэр дотор манай "Эрдэнэт" үйлдвэр бүтээмжээрээ сүүл мушгиж байна. Үйл ажиллагаагаа тэлж байх ёстой мөнгөөрөө хэдэн улстөрчдийн шахаас болсон ажилгүй тавиулуудыг цалинжуулдаг.

Яах вэ, үүнийг Монголын онцлог гэж бодьё. Ядахдаа өнөөдөр дэлхийд байхгүй өндөр АМНАТ буюу роялтийг бууруулж, өрөө дарах, өөрөө өөртөө хөрөнгө оруулах боломжийг нь олгомоор байна. Маргаан дагуулсан 34 хувиасаа татгалзаад, тусгай роялтигаар орлуулах нь зөв.

Ингэсэн цагт "Оюутолгой" хэнээсээ хэдэн хувийн хүүтэй зээл авсан нь манайд ямар ч хамаагүй асуудал болно. "Оюутолгой"-г гартаа оруулах гэсэн хоёр хөршийн төрийн өмчит компаниудын улайрсан дайралт ихсэж байгаа тул бид дотооддоо эрүүл ухаанаар асуудалд хандах ёстой" гэсэн байна.

Эх сурвалж: Өдрийн сонин