Бидний "Хөзрийн хаан" киногоор сайн мэдэх Хонг Конгийн нэрт жүжигчин Чоу Юн Фат өөрийн хуримтлуулсан бүх хөрөнгө болох 710 сая ам.долларыг бүхэлд нь сайн үйлсэд хандивлана гэдгээ мэдэгджээ.
Саяхан Өмнөд Солонгосын MBC (Munhwa Broadcasting Corporation) суваг бүх хөрөнгөө сайн үйлсэд хандивлах болсон шалтгааны тухай асуужээ. 63 настай Чоу Юн Фат өгсөн ярилцлагадаа “Мөнгө чамтай үргэлж хамт байхгүй. Хүн хөрөнгөө авч үхэхгүй шүү дээ, яагаад хэрэгтэй нэгэнд нь өгч болохгүй гэж” хэмээн ярьжээ.
Өөрийгөө Буддист гэдэг Чоу Юн Фат энгийн даруу амьдралтайгаараа алдартай. Тэрээр нийтийн тээврээр зорчиж, Хонг Конгийн гудамжинд үе үе хооллодог аж. Түүний эхнэр нөхрийнхөө талаар “Нөхөр маань их хэмжээний орлого олдог ч сард зөвхөн 200 орчим ам.долларыг л хэрэглээндээ зарцуулдаг” хэмээн олон нийтэд ярьж байсан юм.
Жүжигчин эр тус нэвтрүүлэгт оролцох үеэрээ “Хэн намайг метронд анхаарах юм бэ? Хүмүүсийн 90 хувь нь утсаа ширтэж байдаг шүү дээ” хэмээн тоглоом хийсэн байна.
Чоу 17 жил Нокиа гар утас хэрэглэж байгаад саяхан ухаалаг гар утас барьдаг болжээ. Шалтгаан нь түүний Нокиа эвдэрч, ажиллахаа больсонтой холбоотой гэнэ.
