АНУ-ын иргэн Отто Уормбиер хойд Солонгосын Пхеньянд аялж явахдаа “Янгакто” зочид буудлын хананд байсан улс төрийн зурагт хуудас хулгайлахыг завдсан хэргээр 15 жилийн ял сонссон юм. Тэрээр гэм буруугаа хүлээж ялаа эдэлж байсан ч түүний биеийн байдал эрс муудсан тул Хойд Солонгосын Засгийн газраас суллаж, эх оронд нь хүлээлгэн өгсөн билээ.
Гэвч Отто Уормбиер АНУ-д ухаангүй байдалтай хүргэгдсэн бөгөөд ухаан орохгүй байсаар таалал төгсчээ. АНУ-ын шүүх эмнэлгийн дүгнэлтээр түүнийг тархины хүчилтөрөгч, цусан хангамжийн архаг дутагдлын улмаас нас барсан хэмээн мэдэгдэж байсан байна.
Талийгаач Отто Уормбиерын эцэг эх Хойд солонгосын Засгийн газраас 1.1 тэрбум ам.долларын нөхөн олговор олгохыг нэхэмжилж, өнгөрсөн дөрөвдүгээр сард шүүхэд хандсан байна.
Тэд хүүг нь 17 сар хоригдож байх хугацаанд нь залхаан цээрлүүлсний нөхөн олгобор мөн эцэг, эхийн сэтгэл санааны хохирол хэмээн нэхэмжилжээ.
Тэгвэл, өчигдөр АНУ-ын Колумбын тойргийн шүүхээс Отто Уормбиерын ар гэрт 501 сая ам.долларын нөхөн төлбөрийг БНАСАУ-ын эрх баригчдаар төлүүлэх шийдвэрийг гаргажээ. Энэ нь Хойд Солонгосын эдийн засгийн нийт хэмжээний 4 хувьтай тэнцэх мөнгөн дүн аж.
Шүүхийн шийдвэрийг БНАСАУ-ын эрх баригчдад танилцуулах юм байна.
