Хүүхдүүдийн дунд гарч буй үе тэнгийн дээрэлхэл, дарамт, хүчирхийлэл нь тоглоом төдий зүйл биш бөгөөд эрүүгийн болон зөрчлийн шинжтэй гэмт хэрэг болохыг Цагдаагийн ерөнхий газраас анхаарууллаа.

ЦЕГ-ын мэдээлснээр хүүхдүүд “мөнгө нэхэх”, “үг хэлээр доромжлох”, “биед халдах” зэрэг үйлдлийг анзаарагдахгүй, мэдэгдэхгүй зүйл мэтээр ойлгодог буруу хандлага түгээмэл байна. Гэвч эдгээр нь хуульд заасан хариуцлага хүлээлгэх үндэслэлтэй үйлдэл юм.

“Баригдахгүй л бол гэмт хэрэг биш гэж ойлгодог хүүхдүүд бий. Гэхдээ баригдана. Нэг сар, нэг жил, бүр хэдэн жилийн дараа ч хамаагүй ийм төрлийн хэрэг эцэстээ илэрч шалгагддаг,” гэж ЦЕГ-ын мэргэжилтэн онцоллоо.

Судалгаагаар дээрэлхэлт нь бүх насны хүүхдүүдийн дунд тохиолддог ч, ахлах ангийн сурагчид илүү өртөмтгий байгааг тогтоожээ. Зарим тохиолдолд “тоглоом” эсвэл “хошигнол” мэтээр илэрдэг ч, тухайн хүүхдийн сэтгэл зүйд хүнд нөлөө үзүүлдэг байна.

Сэтгэл зүйчдийн хэлснээр, үе тэнгийнхний үл ойлголцол, бие биенээ таньж мэдэхгүй байх нь дээрэлхэл үүсэх шалтгааны нэг болж байгаа аж. Хүүхдүүд нэгнийхээ сайн чанарыг олж харж, эерэгээр харилцаж сурвал дээрэлхэл багасна.

“Хүүхдийн сайн тал, онцлогийг нь олж хэлэх, урам өгөх нь өөртөө итгэх итгэл нэмдэг. Итгэлтэй хүүхэд өөрийгөө болон бусдыг дарамтлах магадлал бага,” гэж сэтгэл зүйч зөвлөжээ.

Мөн дээрэлхэлтэд өртсөн хүүхдүүд өөрсдийгөө дээрэлхүүлж байна гэдгээ ч ойлгодоггүй, тусламж хүсэхээс ичиж зовдог нь хамгийн том хүндрэл болдог байна. Энэ байдал удаан үргэлжилбэл сэтгэл гутрал, түгшүүр, амиа хорлох зан үйлийн эрсдэлийг нэмэгдүүлэх аюултай.

Сэтгэл зүйч, мэргэжилтнүүд эцэг эхчүүдэд дараах зөвлөмжийг өгч байна. Хүүхдэдээ чанартай цаг гаргаж, бухимдалгүйгээр ярилцах, зан аашийн өөрчлөлтийг анзаарах нь чухал. Харин дээрэлхэлт, гадуурхалт, хүчирхийллийн шинж илэрвэл өөрсдөө шийдэх гэж оролдох бус сургууль, нийгмийн ажилтан, цагдаагийн байгууллагад хандах шаардлагатайг онцолжээ.

“Дээрэлхэл нь хүүхдийн сэтгэцийн эрүүл мэндэд урт хугацааны хохирол учруулдаг. Энэ асуудлыг үл тоомсорлох нь ирээдүйд илүү ноцтой үр дагаварт хүргэж болзошгүй,” гэж сэтгэл зүйчид анхаарууллаа.