АНУ-ын Мянганы сорилтын корпорацийн буцалтгүй тусламж болон Монгол Улсын Засгийн газрын хөрөнгө оруулалтаар санхүүжиж буй нийт 461 сая ам.долларын өртөг бүхий “Улаанбаатар хотын ус хангамжийг нэмэгдүүлэх хөтөлбөр” нь нийслэлийн ирээдүйн усны аюулгүй байдал, тогтвортой хөгжилд стратегийн ач холбогдолтой төслийн нэг болж байна. Хөтөлбөрийн хүрээнд баригдаж буй дэвшилтэт технологи бүхий ус гүн цэвэршүүлэх үйлдвэр нь нийслэлийн Сонгинохайрхан уулын зүүн бэлд байрлаж, одоогийн байдлаар 99.5 хувийн гүйцэтгэлтэй үргэлжилж байна. Уг үйлдвэр ашиглалтад орсноор Улаанбаатар хотын ус хангамжийн баруун эх үүсвэрээс олборлох 50 хүртэл сая шоо метр усыг Монгол Улсын ундны усны стандартад нийцүүлэн цэвэршүүлж, төвлөрсөн ус түгээх сүлжээнд шууд нийлүүлэх боломж бүрдэх юм.

Энэ төслийн хэрэгжилтийн явцад Ус сувгийн удирдах газрын 27 инженер, техникийн ажилтан тоног төхөөрөмжийн суурилуулалт, туршилт тохируулгын шатнаас эхлэн нарийвчилсан дадлага, сургалтад хамрагдсан бөгөөд тэд өнгөрсөн долдугаар сарын 31-ний өдөр албан ёсоор ажилдаа орсон байна. Ингэснээр үйлдвэр ашиглалтад орох үеэс эхлэн мэргэшсэн, бэлтгэгдсэн баг бие даан үйл ажиллагааг хариуцах нөхцөл бүрдэж байгаа юм.

Хөтөлбөр нь гурван үндсэн хэсгээс бүрдэх бөгөөд эдгээр нь харилцан уялдаатайгаар хэрэгжинэ. Үүнд баруун эх үүсвэрийг шинээр байгуулах, хаягдал усыг дахин боловсруулах, усны салбарын тогтвортой байдлыг хангах чиглэлийн төслүүд багтжээ. Энэ бүх ажлыг цогцоор нь хэрэгжүүлснээр Улаанбаатар хотын ус хангамж өнөөгийн түвшнээс 80 гаруй хувиар нэмэгдэж, нийслэлийн баруун бүсийн хөгжлийн боломж эрс нэмэгдэхийн зэрэгцээ эдийн засгийн өсөлтөд шууд эерэг нөлөө үзүүлэх төлөвтэй байна. Мөн усны хомсдолын эрсдэлийг бууруулж, иргэдийн эрүүл ахуйн нөхцөлийг сайжруулах, ундны усны чанар, найдвартай байдлыг олон жилийн турш хадгалах үндэс суурь тавигдах юм.