Дорноговь аймгийн Дэлгэрэх суманд орон нутгийн төсвийн хөрөнгө оруулалтаар барьж буй төрийн албан хаагчдын зургаан айлын орон сууцны барилга энэ зун ашиглалтад орох гэж байна. Тус орон сууцны барилгыг “Дэлгэр цамхаг өргөө” ХХК гүйцэтгэж байгаа бөгөөд одоогоор ажлын явц 95 хувийн гүйцэтгэлтэй байгаа аж.
Уг барилга нь инженерийн шугам сүлжээнд бүрэн холбогдсон бөгөөд хөдөө орон нутагт ажиллаж буй төрийн албан хаагчдад зориулан тав тухтай, тогтвортой орчин нөхцөлийг бүрдүүлэх зорилготойгоор баригдаж байна. Энэхүү орон сууц нь алслагдсан бүсэд ажиллаж буй төрийн албан хаагчдын нийгмийн асуудлыг шийдвэрлэхэд чухал үүрэг гүйцэтгэх юм.
Аймгийн төвөөс 140 км зайд орших, 1300 гаруй хүн амтай Дэлгэрэх сум нь зөвхөн хүн ам зүйн онцлог бус, соёл түүх, байгалийн өвөрмөц тогтоц бүхий газруудаараа ч олонд танигдсан. Шилмэл улаан омгийн ямаа, хурдны угшлын Галсанбанди, Дэндэв тайж адууны өлгий нутаг болсноос гадна Цонжийн чулуу, Жингэр тэмээтийн уулын агуй, Маналын найман суварга зэрэг түүхэн дурсгалт газруудтайгаараа аймгийн есөн гайхамшгийн нэгт багтдаг.
Энэхүү орон сууц ашиглалтад орсноор сумын нийгмийн хөгжилд чухал хувь нэмэр оруулах төдийгүй төрийн албыг хөдөө орон нутагт тогтвортой, мэргэшсэн боловсон хүчнээр хангахад дэмжлэг болох юм.
Эх сурвалж: Дорноговь аймгийн ЗДТГ
