Канад Улсын Альберта мужийн Калгари хотод зохион байгуулагдаж буй олон улсын “Спрюс Медоуз” морин спортын наадмын 50 жилийн ойн хүрээнд “Монголын галерей” үзэсгэлэнгийн асар энэ сарын 7-нд албан ёсоор нээлтээ хийлээ. Тус үзэсгэлэн нь монголын уламжлалт өв соёл, гар урлал, аялал жуулчлал, үндэсний үйлдвэрлэлийг дэлхий дахинд таниулах зорилготой юм.

Нээлтийн арга хэмжээнд Монгол Улсаас Канад Улсад суугаа Элчин сайдын яамны зөвлөх М.Батхуяг, Өмнөговь аймгийн Засаг даргын орлогч Ж.Занабазар, “Спрюс Медоуз” байгууллагын Ерөнхийлөгч бөгөөд Ерөнхий захирал Линда Саутерн-Хийткотт, Альберта муж дахь Өргөмжит консул Питер Уоллис нар оролцож, мэндчилгээ дэвшүүлэв.

Зөвлөх М.Батхуяг Монгол Улсын морин соёл дэлхийн хэмжээнд хүлээн зөвшөөрөгдөж, НҮБ-ын Ерөнхий Ассамблей Монголын санаачилгаар долоодугаар сарын 11-нийг “Дэлхийн адууны өдөр” болгон зарласныг онцлон дурдсан юм. Түүнчлэн тэрбээр хоёр орны адууны соёл, түүхэн уламжлал, морин спортын холбоог тэмдэглэн, ийнхүү Канадын нэр хүндтэй наадмын хүрээнд Монгол орныг сурталчилж байгаад талархал илэрхийлсэн байна.

Үзэсгэлэн энэ сарын 15-ны өдөр хүртэл үргэлжлэх бөгөөд монгол үндэсний хувцас, арьс шир, ноос ноолуур, гар урлалын бүтээгдэхүүнүүдийг олон нийтэд танилцуулж, Монгол орны аялал жуулчлалын боломжийг сурталчилж байна. Үүний зэрэгцээ “Монголын галерей” үзэсгэлэнг Өмнөговь аймгийн Засаг даргын Тамгын газар, Экспорт, олон улсын худалдааны төв хамтран Калгари хот дахь монгол иргэдийн дэмжлэгтэйгээр зохион байгуулж байна.

Дэлхийн томоохон морин спортын наадмуудын нэгт тооцогдох “Спрюс Медоуз” нь жил бүр 1000 гаруй морь оролцдог, 25 мянга гаруй үзэгчтэй, олон улсын морин харайлтын 10 тэмцээнийг зохион байгуулдаг өндөр цар хүрээтэй арга хэмжээ гэдгийг тус улсад суугаа ЭСЯ онцолжээ.

Эх сурвалж: Монгол Улсаас Канад Улсад суугаа Элчин сайдын яам