Иргэнийг цахим орчинд баталгаажуулах үндэсний ДАН 1.0 системийг шинэчилж, ДАН 2.0 хувилбарыг нэвтрүүлж эхэлжээ. Цахим хөгжлийн яамнаас мэдээлснээр шинэ систем нь илүү өргөн хүрээтэй, хүртээмжтэй, аюулгүй байдлыг хангах боломжуудтай болж байгаагаараа онцлог юм.
ДАН 2.0 хувилбар нь иргэнийг зөвхөн гар утасны аппликэйшнээр бус царай таних технологи зэрэг нийт зургаан төрлийн аргаар баталгаажуулж, гадаадад оршин суугаа монголчууд ч нэвтрэх боломжтой олон хувилбаруудыг нэвтрүүлж байна. Үүний зэрэгцээ төр болон хувийн хэвшлийн мэдээллийг нэгтгэсэн нэгдсэн платформ болгон хөгжүүлж байгаа нь цахим баримт бичиг баталгаажуулах, тоон гарын үсгийг ашиглах үйл явцыг илүү хялбар, шуурхай болгоно.
Түүнчлэн нэг удаагийн код илгээдэг механизм нэвтэрснээр хэрэглэгч бүрт гардаг зардлыг жилд 600-800 сая төгрөгөөр бууруулах боломж бүрдэж байна. Мөн уг шинэчлэл нь хөгжлийн бэрхшээлтэй иргэдэд зориулсан хүртээмжтэй байдал, оролцоог сайжруулах чухал алхам болж байгааг Цахим хөгжил, харилцаа холбооны яам тодотгожээ.
Эх сурвалж: ЦХИХХЯ
