БНСУ-ын Засгийн газрын буцалтгүй тусламжаар баригдсан “Аялал жуулчлалын сургалтын төв”-ийг өнөөдөр нийслэлийн Хан-Уул дүүргийн Арцатын амд албан ёсоор нээлээ. Энэхүү төв нь Монгол, БНСУ-ын Засгийн газар хоорондын хамтын ажиллагааны хүрээнд аялал жуулчлалын салбарын хүний нөөцийн чадавхыг бэхжүүлэх зорилгоор байгуулагдаж байгаа юм.

Нийт 2739.8 ам метр талбайтай, 250 хүний багтаамжтай сургалтын танхим, 10-30 хүний багтаамжтай 6 анги, хоол үйлдвэрлэл, тогоочийн дадлага сургалтын иж бүрэн тоног төхөөрөмж бүхий орчин үеийн төвд жилд 850-2600 хүн шинээр, 1800-5700 хүн давтан сургалтад хамрагдах боломжтой. Тус төв нь олон улсын сургалтын байгууллагуудтай хамтран аялал жуулчлал, зочлох үйлчилгээний салбарын ажилтнуудыг мэргэшүүлэх, хөгжүүлэх, шинэ мэдлэг, ур чадвар олгох үйл ажиллагаа явуулах юм.

Сургалтын төвд жуулчин тээвэр, аяллын хөтөч, зочлох үйлчилгээ, ресторан зоогийн газар, зөөгч, менежмент, тогоочийн ур чадвар, цахим технологийн чиглэлийн хөтөлбөрүүд хэрэгжих бөгөөд мэргэжлийн холбоод, орон нутгийн аялал жуулчлалын байгууллагууд хамтран оролцоно.

Нээлтийн арга хэмжээнд Соёл, спорт, аялал жуулчлал, залуучуудын сайд Ч.Номин, БНСУ-ын Соёл, спорт, аялал жуулчлалын яамны Олон улсын хамтын ажиллагааны хэлтсийн дарга И Хэ Рим, БНСУ-ын Аялал жуулчлалын корпораци, MICE газрын төлөөлөл, Монголын аялал жуулчлалын чиглэлийн холбоод, Европ, Япон, Хятад, БНСУ-ын тур операторуудын холбоо, аймаг, орон нутгийн аялал жуулчлалын албан хаагчид оролцжээ.

Энэхүү төв нь салбарын хөгжилд чухал хувь нэмэр оруулж, бүс нутгийн болон олон улсын аялал жуулчлалын ур чадварын төв болох зорилготой.

Эх сурвалж: НЗДТГ-ын Хэвлэл мэдээлэл, олон нийттэй харилцах хэлтэс