Чингэлтэй, Сүхбаатар дүүргийн нутаг дэвсгэрт хэрэгжих “20 минутын хот” загварт нийцсэн анхны жишиг төсөл болох Сэлбэ дэд төвийн барилга угсралтын ажил албан ёсоор эхэллээ. Энэ төсөл нь 158 га талбайд нийт 2,206 нэгж талбайг хамрах бөгөөд эхний ээлжийн хоёр багц тендерийн хүрээнд 4,400 айлын орон сууцыг 6 буудал, Оргил худалдааны төв орчмын 25.6 га газарт барихаар төлөвлөжээ.

Нийслэлийн Засаг дарга бөгөөд Улаанбаатар хотын Захирагч Х.Нямбаатар бүтээн байгуулалтын эхлэлтэй холбогдуулан “Бид эрх зүйн орчноо бүрдүүлэхээс эхлэн, УИХ-аар гэр хорооллыг орон сууцжуулах болон түгжрэлийг бууруулах тухай хууль батлуулж, мөн Өрийн удирдлагын тухай хуульд өөрчлөлт оруулан санхүүжилтийн эх үүсвэрийг бүрдүүлсэн. Газар чөлөөлөлт, зураг төсөв, техник эдийн засгийн үндэслэлээ боловсруулж, өнөөдөр ийнхүү барилгын ажлыг эхлүүлж байна” гэж онцлов.

Сэлбэ дэд төв нь нийтдээ 13,000 айлын орон сууц бүхий иж бүрэн хотхон болон хөгжих бөгөөд “Өнөр” хороололтой дүйцэхүйц хэмжээний шинэ суурьшлын бүс болно. Барилгын ажлыг 24 сарын хугацаанд бүрэн дуусгаж, гэр хорооллын агаар, хөрсний бохирдлыг бууруулах, орчин үеийн хот төлөвлөлтийг хэрэгжүүлэх зорилт тавьжээ.

Бүтээн байгуулалтын хүрээнд дараах онцлог шийдлүүдийг тусгасан байна:

• Сэргээгдэх эрчим хүч ашиглах: Орц, лифт зэргийн цахилгаан хэрэглээг нарны панелаар хангана.

• Зэс хоолой бүхий усны шугам: Орон сууц бүр хэрэглээний усаа зэвэрдэггүй материалаар авах боломжтой.

• Хөв цөөрөм, ус зайлуулах шугам: Сэлбэ гол дээр үерийн аюулыг бууруулах хөв байгуулж, борооны усны системтэй уялдуулна.

• Боловсролын шинэ төвүүд: Төслийн хүрээнд 3 шинэ төрөлжсөн сургууль, 5 цэцэрлэг баригдана.

• Соёлын байгууламж: Монгол Улсын циркийг шинэ хотын төвд байрлуулах тухай Соёлын яамтай зөвшилцсөн.

Ийнхүү Сэлбэ дэд төв нь зөвхөн орон сууц бус, боловсрол, соёл, дэд бүтэц, экологийн шийдлийг хамтад нь шийдсэн иж бүрэн “20 минутын хот”-ын үндэс суурийг тавьж буйгаар онцлог юм.

Эх сурвалж: НЗДТГ-ын Хэвлэл мэдээлэл, олон нийттэй харилцах хэлтэс