Хиймэл оюун ухааны дэлхийн тэргүүлэгч компани болох Америкийн OpenAI байгууллага өөрийн олон улсын дэд бүтцээ өргөжүүлэх хүрээнд Өмнөд Солонгост анхны салбар оффисоо Сөүл хотод байгуулахаар болсноо өнөөдөр албан ёсоор мэдэгдлээ.
OpenAI компанийн стратегийн бодлого хариуцсан ахлах ажилтан Жейсон Квоны мэдээлснээр, “Манай дараагийн олон улсын оффис Сөүлд байх болно. Энэ нь Токио болон Сингапурын дараах Ази дахь гурав дахь салбар байх юм” хэмээн тэрбээр Сөүл хотод болсон хэвлэлийн хурлын үеэр онцолжээ.
OpenAI сүүлийн жилүүдэд дэлхийн томоохон хотууд болох Парис, Брюссель, Сингапур, Лондон, Даблин, Токио зэрэг газарт нийт 11 шинэ оффис байгуулсан. Өмнөд Солонгост албан ёсоор үйл ажиллагаа эхлүүлэхээсээ өмнө тус компани Kakao, Krafton, SK Telecom зэрэг нэр хүндтэй компанитай хиймэл оюун ухааны технологи болон дата төвүүдийн хөгжилд хамтран ажиллаж ирсэн байна.
OpenAI-ын мэдээлснээр, Өмнөд Солонгос нь ChatGPT болон тус компанийн платформуудыг ашигладаг хэрэглэгч, хөгжүүлэгчдийн тоогоор дэлхийд эхний 10 байрт ордог бөгөөд ялангуяа ChatGPT-ийн төлбөртэй хэрэглэгчдийн тоогоор АНУ-ын дараа хоёрдугаарт бичигдэж байна.
Эх сурвалж: Yonhap
