УИХ-ын чуулганы өнөөдрийн нэгдсэн хуралдаанаар Монгол Улс болон Евразийн эдийн засгийн холбоо, түүний гишүүн орнууд хоорондын худалдааны түр хэлэлцээрийг соёрхон батлах тухай хуулийн төслийн хэлэлцүүлгийг үргэлжлүүлэв. Тус төслийг өмнөх пүрэв гарагийн нэгдсэн хуралдаанаар хэлэлцэж эхэлсэн ч санал хураалтыг хойшлуулаад байсан юм. Үүний дагуу хэлэлцээрийг соёрхон батлах тухай хуулийн төслийг дэмжих эсэхээр санал хураалт явуулахад нэгдсэн хуралдаанд оролцсон наян нэгэн гишүүний жаран найм нь дэмжиж, олонхийн саналаар батлагдлаа.
Мөн уг хэлэлцээртэй холбогдуулан УИХ-ын тогтоол батлуулах асуудлаар Аюулгүй байдал, гадаад бодлогын байнгын хорооны дэмжсэн зарчмын зөрүүтэй саналын томьёоллоор санал хураалт явуулахад гишүүдийн олонх дэмжсэн байна.
Хэлэлцээр хэрэгжсэнээр Монгол Улс Евразийн эдийн засгийн холбооны гишүүн орнууд руу гурван зуун жаран долоон нэр төрлийн бараанд гаалийн тарифын хөнгөлөлт, чөлөөлөлт эдлэх боломж бүрдэх бөгөөд энэ нь аж ахуйн нэгжүүдийн орлогыг нэмэгдүүлэх, хөдөө аж ахуйн салбарт шинэ зах зээл нээх, дотоодын бизнес эрхлэгчдийн гадаад худалдааны туршлага, чадавхыг ахиулахын зэрэгцээ олон улсын стандартад нийцсэн бүтээгдэхүүн үйлдвэрлэхэд бодит түлхэц үзүүлэх ач холбогдолтой гэж үзэж байна.
Эх сурвалж: Улсын Их Хурал
