Монгол Улсын Зэвсэгт хүчин болон Европын холбоо хамтран хэрэгжүүлсэн “Жендэрийн тэгш байдлын элч – Монголын энхийг сахиулагчид” төсөл албан ёсоор хаагдлаа. Энэхүү төсөл нь анх удаа хоёр талын хамтын ажиллагаагаар хэрэгжсэн бөгөөд жендэрийн мэдлэг, чадамжийг нэмэгдүүлэх, энхийн ажиллагаанд Монголын оролцоог илүү хүлээн зөвшөөрөгдөх түвшинд хүргэх зорилготой байв.
ЗХЖШ-ын дарга, хошууч генерал С.Ганбямба хэлэхдээ “Монголын энхийг сахиулагчид жендэрийн тэгш байдлыг хэрэгжүүлэх чадамжтай, үлгэр жишээ хүчин хэмээн олон улсын тавцанд үнэлэгдэж байна” хэмээн онцлов. Мөн Европын холбооны Монгол Улсад суугаа Элчин сайд Ина Марчюлёните төслийн үр дүнг Монголын нэр хүндийг нэмэгдүүлсэн чухал алхам хэмээн үнэлж, энхийн төлөөх манлайлал нь дотоодод ч эерэг өөрчлөлт авчирна гэдэгт итгэлтэй байгаагаа илэрхийлжээ.
Төслийн хүрээнд Монголын Зэвсэгт хүчний 22 цэргийн алба хаагч Бүгд Найрамдах Словени Улсад жендэрийн мэргэшүүлэх сургалтад хамрагдсан бол улмаар тэдний дэмжлэгтэйгээр 80 гаруй албан тушаалтанд зориулсан “Жендэрийн мэдрэмжтэй Зэвсэгт хүчин” арга зүйн цугларалт, “Хамтдаа манлайлж, хамтдаа хөгжье” форум, удирдах түвшний 200 гаруй офицерт зориулсан сургалтуудыг зохион байгуулсан байна.
Монгол Улс 2002 оноос хойш энхийг дэмжих болон хүмүүнлэгийн ажиллагаанд идэвхтэй оролцож ирсэн бөгөөд энэ хугацаанд нийт 23 мянга гаруй алба хаагчийг НҮБ-ын энхийн ажиллагаанд илгээжээ.
Эх сурвалж: Монгол Улсын Зэвсэгт хүчин, Европын холбоо
