“Бүс нутгийн авто зам хөгжүүлэх, засвар арчлалтын төсөл”-ийн хүрээнд Алтай–Улиастай чиглэлийн 178 км авто замын эхлэл хэсэг, мөн Улиастай–Цагаанхайрхан чиглэлийн 40 км хатуу хучилттай авто замын төслийн нээлт боллоо. Төслийн нээлтийн үйл ажиллагаанд Улсын Их Хурлын дарга Д.Амарбаясгалан, Зам тээврийн хөгжлийн яамны Төрийн нарийн бичгийн дарга С.Батболд, УИХ-ын гишүүн О.Амгаланбаатар, Завхан аймгийн Засаг дарга Г.Өнөрбаяр нар оролцсон байна.

Уг авто зам нь:

• Завхан аймгийн Улиастай сумаас Цагаанхайрхан сум

• Алдархаан сумын нутгаар дайран өнгөрөх

• Азийн хөгжлийн банкны хөнгөлөлттэй зээлийн санхүүжилтээр,

• III үе шатны багц 2 хэлбэрээр хэрэгжих бөгөөд

• 2028 онд ашиглалтад орохоор төлөвлөгдсөн байна.

Мөн энэхүү зам нь Улиастай–Алтай–Бургастай боомт чиглэлийн баруун босоо тэнхлэгийн авто замын нэг хэсэг болж, аймгийн төвөөс сумын төвийг холбох, олон улсын тээврийн сүлжээнд Монгол Улсыг холбох чухал үүрэгтэй юм. Төслийг Чайна Жиангсу Интернэйшнл Экономик Техникал Корпорейшн Групп гүйцэтгэх аж.

Үүнээс гадна, улсын төсвийн хөрөнгөөр хэрэгжих Нөмрөг–Улаангом чиглэлийн А18 авто замаас Арцсуурь хилийн боомт хүртэлх хатуу хучилттай авто замын барилгын ажил Түдэвтэй суманд эхэлж байгаа талаар мөн мэдээлжээ.

Эдгээр замууд нь ирээдүйд ОХУ–БНХАУ-ыг холбох баруун бүсийн олон улсын тээврийн коридор болж, Завхан аймаг тээвэр, логистикийн төв болон хөгжих стратегийн суурийг тавьж байгаа юм. Коридор замын зураг төсөл, ТЭЗҮ боловсруулах тендер зарлагдаад байгаа талаар Завхан аймгийн ЗДТГ мэдээллээ.

Эх сурвалж: Завхан аймгийн Засаг даргын Тамгын газар