УИХ-ын дарга Д.Амарбаясгалан, УИХ-ын гишүүн О.Амгаланбаатар нар Говь-Алтай аймгийн Есөнбулаг, Дэлгэр сумын авто замын ажлыг албан ёсоор эхлүүллээ. Энэхүү төсөл нь улсын төсвийн хөрөнгө оруулалтаар хийгдэж байгаа бөгөөд аймгийн төв болох Алтай хотын хатуу хучилттай авто замын үргэлжлэл болох 15.6 км шинэ зам тавигдана.
Тус авто зам нь Есөнбулаг сумын 6 багийг хамарч, иргэдийн амьдралын чанарыг дээшлүүлэх, төрийн үйлчилгээ, ЖДҮ, худалдаа үйлчилгээ, аялал жуулчлалын хүртээмжийг нэмэгдүүлэх, дэд бүтцийн хөгжилд чухал нөлөө үзүүлэх зорилготой юм. Замыг 2026 оны наймдугаар сард бүрэн ашиглалтад оруулах төлөвлөгөөтэй байна.
УИХ-ын дарга Д.Амарбаясгалан:
“Энэхүү авто зам нь зөвхөн өнөөдрийн хэрэгцээг хангах бус ирээдүйн хөгжлийн гарц, бүс нутгийн уялдаа холбоог сайжруулах ач холбогдолтой” хэмээн онцоллоо.
Мөн Алтай-Бургастай чиглэлийн замын зураг төсөл дууссан бөгөөд гүйцэтгэгчийг сонгон шалгаруулах ажил амжилттай болж, Шарга, Бугат, Цээл, Алтай сумууд аймгийн төвтэй хатуу хучилттай замаар холбогдох боломж бүрдэхээр байна.
Түүнчлэн, баруун бүсийг эрчим хүчний төв болгон хөгжүүлэх бодлогын хүрээнд Говь-Алтай аймагт сэргээгдэх эрчим хүчний судалгааны төв барих ажил ойрын жилүүдэд эхэлнэ. Ингэснээр тус аймаг найдвартай зам, эрчим хүчний дэд бүтэцтэй болж, эдийн засаг, үйлдвэрлэл, худалдааны хөгжилд түлхэц өгөх юм.
Эх сурвалж: УИХ-ын Хэвлэл мэдээллийн газар
