Өвөрхангай аймгийн Бүсийн оношилгоо, эмчилгээний төвийн (БОЭТ) цахим бүртгэл, яаралтай тусламжийн хэсгийг нэгтгэн Шуурхай удирдлагын нэгж болгон шинэчилж, нэг цэгийн тусламж үйлчилгээг нэвтрүүлжээ. Энэхүү шинэчлэлд тус аймгаас төрөн гарсан нэртэй уран бүтээлчид, спортын алдартнууд нэгдсэн “Соёмбо” нэгдэл 10 сая төгрөгийн хандив өргөн, нийгмийн хариуцлагын хүрээнд оролцсон байна.

Тус нэгдэлд харьяалагддаг МУСТА С.Нэргүй, Э.Чулуунчимэг, МУГТ Д.Төмөрхүлэг, Монгол Улсын харцага Б.Цэдэнсодном нар Арвайхээр хотод болсон нээлтийн үйл ажиллагаанд оролцож, “Бидний нутаг Өвөрхангай” тоглолтоо хүргэсэн юм. Тэд сайн үйлсийн аян өрнүүлж, эрүүл мэндийн үйлчилгээний хүртээмжийг нэмэгдүүлэхэд хувь нэмэр оруулж байгаадаа сэтгэл хангалуун байгаагаа илэрхийллээ.

БОЭТ нь Юнител групптэй гурван жилийн хамтын ажиллагааны гэрээ байгуулж, интернетийн хурдыг 1000 Mbps хүртэл нэмэгдүүлэн wi-fi сүлжээг бүрэн шинэчилжээ. Ингэснээр иргэд, өвчтөнүүд илүү ая тухтай, түргэн шуурхай орчинд үйлчилгээ авах боломжтой болсон байна.

Мөн 77326666 дугаараар бүх дуудлагыг хүлээн авдаг нэгдсэн дуудлагын системийг нэвтрүүлж, эрүүл мэндийн тусламж үйлчилгээг илүү хүртээмжтэй, эргэх холбоотой болгох ажлыг эхлүүлээд байна.

Түүнчлэн шинэ орчинд Киоск машин суурилуулснаар иргэд эрүүл мэндийн лавлагаа, төлбөр тооцоо зэрэг үйлчилгээг нэг цэгээс түргэн шуурхай авах нөхцөл бүрдүүлжээ.

БОЭТ-ийн захирал Г.Дашжанцан хэлэхдээ, энэхүү шинэчлэл нь иргэдийн хүлээлтийг бууруулж, тусламж үйлчилгээг шуурхай хүргэх, цахим шилжилтийг гүнзгийрүүлэх зорилготой хэмээн онцолсон юм.

Эх сурвалж: Өвөрхангай аймгийн БОЭТ