Нийслэлийг хөгжүүлэх 24 мега төслийн хүрээнд хэрэгжих тусгай замын автобус (BRT) төслийг Ард Аюушийн өргөн чөлөөнөөс Их хүрээний гудамж хүртэлх 12.7 км коридорын дагуу хэрэгжүүлэхээр төлөвлөжээ. Энэ нь нийслэлийн авто замын ачааллыг бууруулах, нийтийн тээврийн чанар, хүртээмжийг сайжруулах зорилготой төсөл юм.

Төслийн үндсэн үзүүлэлтүүд:

• Өдөрт тээвэрлэх хүчин чадал: 25–35 мянган зорчигч

• Буудлын тоо: 17

• Дундаж хурд: 20–25 км/цаг

• Дундаж зорчих хугацаа: 15–20 минут

• Замын хөдөлгөөний дундаж хурд нэмэгдэх хэмжээ: 12.6 хувь

Азийн хөгжлийн банкны санхүүжилтээр хэрэгжих энэхүү төслийн зураг төсөл 60 орчим хувьтай байгаа бөгөөд “Far East Mobility” компани зураг төслийг боловсруулж байна. Тус компани нь БНХАУ, АНУ, Индонез, Филиппин зэрэг улсад тусгай замын автобусны чиглэлээр олон жил ажилласан туршлагатай аж.

Төслийн хэрэгжилтийн үе шат:

• Барилга угсралтын ажил: 2026 оны дөрөвдүгээр сард эхэлнэ

• Ашиглалтад орох хугацаа: 2028 оны эхээр

Нийслэлд өмнө нь 2011, 2019, 2023 онд хийсэн судалгаагаар өдөрт 1.5 сая гаруй хүн нийтийн тээврээр үйлчлүүлж байгааг тогтоосон нь BRT систем нэвтрүүлэх хэрэгцээ өндөр байгааг нотолжээ. Замын өргөн, зорчигчдын урсгал зэргийг харгалзан үзэхэд тусгай замын автобус нь нийслэлийн нийтийн тээвэрт хамгийн оновчтой шийдлийн нэг гэж үзэж байна.

Төслийн зөвлөлдөх уулзалтын үеэр үйл ажиллагааны төлөвлөгөө, санхүүжилт, зохицуулалтын дэд бүтэц болон оролцогч талуудын хамтын ажиллагааг сайжруулах асуудлуудыг хэлэлцжээ.

Эх сурвалж: НЗДТГ-ын Хэвлэл мэдээлэл, олон нийттэй харилцах хэлтэс.