БНСУ-ын ерөнхийлөгч Мүүн Жэ Ины нэр хүнд 52,2 хувь хүртэл, урьд өмнө байгаагүйгээр унасан тухай “Korea time's” сонин мэдээлжээ. Өмнөд Солонгосын удирдагчийн нэр хүнд улс оронд нүүрэлсэн нийгэм-эдийн засгийн асуудалтай холбогдуулан сүүлийн 8 долоо хоног дараалан ийнхүү доошилж байгаа юм.

“Мүүн Жэ Ин 2017 оны 5-р сард засгийн эрхэнд гарахдаа тус улсын хамгийн их нэр хүндтэй ерөнхийлөгч байсан, гэтэл тэрнээс хойш бүтэн хагас жилийн дараа тэрбээр сонгогчдынхоо дэмжлэгийг алдаж, сонгуулийн үеэр өгч байсан амлалтаа биелүүлээгүй” гэж сонин бичиж байна. Ерөнхийлөгчийн нэр хүнд ийнхүү унаж байгаа нь үндэсний эдийн засгаа сэргээх гэсэн Мүүн Жэ Ины засаг захиргааны амжилтгүй оролдлогод, мөн өнгөрсөн 10-р сард сүүлийн 13 жилд байгаагүй доод үзүүлэлтэд хүрсэн ажилгүйдэл өсөн нэмэгдэж байгаад ард иргэд сэтгэл дундуур байгаагийн илрэл юм. Судалгааны дүнгээс үзэхэд ерөнхийлөгчийн нэр хүнд 30 хүртэлх насны залуучууд болон жижиг бизнес эрхлэгчид дунд маш доогуур байна. Дээрээс нь ихэнх солонгосчууд Мүүн Жэ Ин бодит байдлаас хэт холдсон, ард иргэд хэрхэн яаж амьдарч байгаа, тэд юунд санаа зовж байгаа талаар ямар ч ойлголтгүй байдаг гэж үздэг болжээ.

"Улс орон нь хүнд цаг үеийг туулж байхад яагаад ерөнхийлөгч Хойд Солонгостой харилцаа тогтоох асуудалд хэт их анхаарал хандуулаад байна гэдгийг ойлгохгүй байна" гэж иргэд өгүүлжээ. Мүүн Жэ Ины засаг захиргаанаас авч хэрэгжүүлсэн нэг шинэчлэл бол долоо хоногийн ажлын цагийг 68-аас 52 цаг болгосон явдал. Энэ 52 цагийн 40 цаг нь ажлын үндсэн цаг, 12 нь илүү цаг гэж тооцогддог. Мүүн Жэ Ины бодож санаснаар энэ өөрчлөлт ажил хөдөлмөр эрхэлдэг солонгосчуудад илүү чөлөөт цагтай байж, хувийн амьдралдаа цаг зав гаргаж, ингэснээр улс оронд төрөлт нэмэгдэнэ гэж тооцоолж байсан, хэдийгээр одоо энэ төлөвлөгөө амжилтад хүрсэн талаар ярих эрт байгаа ч эдийн засгийн үр дагавар нь харагдаж эхлээд байна. Энэ хууль хэрэгжиж эхэлснээр ажил олгогчид жилд 11 тэрбум долларын алдагдалд оруулж байгаа юм. Мөн хөлсний ажилчид ч гэсэн алдагдал хүлээхээр болж байна.