“Дүрслэх урлагийн шилдэг бүтээл шалгаруулах, улсын санд худалдан авах, хадгалах, ашиглах журам”-ын дагуу 2024 онд улсын санд худалдан авах шилдэг бүтээлийн шагнал гардуулах ёслол Уран зургийн галерейд (2024.11.04) боллоо.
2024 оны шилдэг бүтээлийн үзэсгэлэнд уран зураг, график, уран баримал, сийлбэр, инстоляци, холимог техникийн нийт 118 уран бүтээлчийн 149 бүтээл ирүүлснээс орон тооны бус мэргэжлийн зөвлөл нь улсын санд худалдан авах шилдэг бүтээлийг 2 үе шаттай шалгаруулав. Эхний шалгаруулалтад тэнцсэн 58 шилдэг бүтээлээр “Оны шилдэг бүтээл-2024” үзэсгэлэнг зохион байгуулж үзэгчдэд толилуулсан бол хоёрдугаар шатны шалгаруулалтаар улсын санд худалдан авах 3 шилдэг бүтээлийг шалгаруулж олон нийтэд танилцууллаа.
Орчин үеийн дүрслэх урлагийн хөгжлийн ололт, чиг хандлага, үзэл баримтлалыг илэрхийлэх “Дүрслэх урлагийн 2024 оны шилдэг бүтээл”-ээр
1. Уран бүтээлч Д.Дорждэрэм “Орон зай-д” 2024 он, орчин үеийн урлагийн бүтээл
2. Зураач Г.Төмөр “Ханбаянзүрх хайрхан” 2023 он, уран зураг
3. Уран бүтээлч Э.Жанцанхорол “Хадгалагдсан зовинол” 2024 он, орчин үеийн урлагийн бүтээл тус тус шалгарлаа.
Монголын уран зургийн галерей “Оны шилдэг бүтээл 2024” үзэсгэлэнгийн зохион байгуулалт, цар хүрээг өргөтгөх, үзэсгэлэнгийн нэр хүндийг дээшлүүлэх, уран бүтээлчдийг дэмжих зорилгоор үзэгчдийн таашаал хүртсэн нэг бүтээлд “Монголын уран зургийн галерейн нэрэмжит шагнал”-ыг гардуулж ирсэн. Энэхүү нэр хүндтэй шагналыг залуу уран бүтээлч Г.Мөнхболор “Зүүдний хүрд” 2024 он, орчин үеийн урлагийн бүтээлээр хүртэж Монголын уран зургийн галерейн үзэсгэлэнгийн танхимд бие даасан үзэсгэлэн гаргах эрх, хүрэл цомын эзнээр тодров.
Уг хүрэл цомыг уран бүтээлч хүний харааны ур, гарын ур, оюуны урыг бэлгэдэн уран барималч Б.Ганбаатар урласан юм.
Зураач Г.Төмөр “Хан Баянзүрх хайрхан” 2023 он, уран зураг
Э.Жанцанхорол “Хадгалагдсан зовинол” 2024 он, холимог техник
Монголын уран зургийн галерейн нэрэмжит шагнал Уран бүтээлч Г.Мөнхболор “Зүүдний хүрд” 2024 он, холимог техник
