Саудын Араб хойд бүс нутагтаа 440 км квадрат газар хамарсан уул уурхайн үйлдвэрлэлийн хот байгуулах 22 тэрбум долларын уул уурхайн "Waad Al-Shamaal" төслөө энэ пүрэв гаригт нээх гэж байна.
Нийт 85 тэрбум риал буюу 22.7 тэрбум долларын өртөгтэй энэ төсөл 10 мянган ажлын байр бий болгоно гэж Саудын Арабын Уул уурхайн сайд Халид Аль Фалих ярьжээ.
Саудын Араб уул уурхайн салбарын үйлдвэрлэлийн эдийн засагт үзүүлэх үр ашгийг 2030 он гэхэд гурав дахин нэмэгдүүлэх зорилготой байгаа аж.
Энэ бүс нутагт фосфатын хүдрийн дэлхийн батлагдсан нөөцийн долоо орчим хувь буюу 500 сая тонн нөөцтэй гэж Саудын эрх баригчид тооцож байгаа юм. Мөн үүнээс гадна энэ улсын ашиглаагүй байгаа байгалийн баялаг таван их наяд риалийн үнэ хүрнэ гэж дүгнэж байгаа ажээ.
Үүнтэй холбоотойгоор тус улс уул уурхайн салбараа гадаадын хөрөнгө оруулагчдад нээлттэй болгоно гэж төлөвлөж байгаа юм байна. Одоогоор Саудын Арабын уул уурхайн салбарт “Ma'aden” компани дангаараа алт, зэс, хөнгөн цагаан, фосфат үйлдвэрлэл явуулж байна.
